ന്യൂഡൽഹി: മാരുതി സുസുക്കിയുടെ വാഹനങ്ങളുടെ വില വർദ്ധനവ് ഇന്ന് മുതൽ പ്രാബല്യത്തിൽ. നിർമ്മാണ ചെലവ് വർദ്ധിച്ചതിനെ തുടർന്നാണ് ഇന്ത്യയിലെ വലിയ കാർ നിർമ്മാതാക്കളായ മാരുതി സുസുക്കി കാറുകളുടെ വില വർദ്ധിപ്പിച്ചത്.
നിലവിൽ വിപണിയിലുള്ള എല്ലാ മോഡലുകൾക്കും വില വർധിപ്പിക്കും. ഓരോ മോഡലുകൾക്കും വ്യത്യസ്തമായ വില വർദ്ധനവാണ് മാരുതി സുസുക്കി നടപ്പാക്കുന്നത്. ഏകദേശം 1.1 ശതമാനം വരെയാണ് വിലവർദ്ധനവ്. കഴിഞ്ഞ ഡിസംബറിൽ തന്നെ വില വർദ്ധനവ് നടപ്പാക്കുമെന്ന് കമ്പനി അറിയിച്ചിരുന്നു.
ടാറ്റ മോട്ടോഴ്സ് , സ്കോഡ , വോൾവോ തുടങ്ങിയ കമ്പനികളും കഴിഞ്ഞ മൂന്ന് മാസത്തിനിടെ വിലവർദ്ധനവ് വരുത്തിയിട്ടുണ്ട്. സ്കോഡ 60,000 രൂപ വരെ മോഡലുകൾക്ക് വില കൂട്ടിയപ്പോൾ ടാറ്റ മോട്ടോഴ്സ് മോഡലുകളിലുടനീളം വില 0.9% വരെയാണ് വില വർദ്ധിപ്പിച്ചത്.
