തിരുവനന്തപുരം: നേതാജി ജയന്തി ദിവസമായ ജനുവരി 23ന് പാർലമെന്റിൽ പ്രസംഗിക്കാൻ തയ്യാറെടുത്ത് തിരുവനന്തപുരം സ്വദേശിനിയായ രോഹിണി. പ്രധാനമന്ത്രി നരേന്ദ്ര മോദി, ലോക്സഭാ സ്പീക്കർ ഓം ബിർള തുടങ്ങിയ പ്രമുഖരുടെ സാന്നിദ്ധ്യത്തിൽ ഹിന്ദിയിലാകും രോഹിണിയുടെ പ്രസംഗം. വിവിധ സംസ്ഥാനങ്ങളിൽ നിന്നും പ്രസംഗ മികവിന്റെ അടിസ്ഥാനത്തിൽ തിരഞ്ഞെടുക്കപ്പെട്ട 27 പേർക്കാണ് അവസരം. പരിപാടിയിലേക്ക് തിരഞ്ഞെടുക്കപ്പെട്ട ഏക മലയാളിയാണ് രോഹിണി.
പ്രധാനമന്ത്രിയുമായി ആശയവിനിമയം നടത്താനും റിപ്പബ്ലിക് ദിന പരേഡ് പ്രത്യേക പവലിയനിലിരുന്ന് കാണുവാനും രോഹിണിക്ക് അവസരം ലഭിക്കും. ചെമ്പഴന്തി ശ്രീ നാരായണ കോളേജിൽ നിന്നും ഇംഗ്ലീഷ് സാഹിത്യത്തിൽ ബിരുദാനന്തര ബിരുദം നേടിയ രോഹിണി 2020ലെ ദേശീയ യുവജനോത്സവത്തിൽ പ്രസംഗ മത്സരത്തിലെ ഒന്നാം സ്ഥാനക്കാരിയാണ്. 2016-19 കാലഘട്ടത്തിൽ ഇന്റർ യൂണിവേഴ്സിറ്റി പ്രസംഗ- സംവാദ മത്സരങ്ങളിൽ കേരള സർവകലാശാലക്ക് വേണ്ടി നിരവധി പുരസ്കാരങ്ങൾ നേടിയിട്ടുണ്ട്. 2017-2020 കാലഘട്ടത്തിൽ ഹിന്ദി പ്രസംഗ മത്സരങ്ങളിൽ കേരള സർവകലാശാലയെ ആറു തവണ് പ്രതിനിധീകരിച്ചിട്ടുണ്ട്.
തിരുവനന്തപുരം ചെല്ലമംഗലം ശങ്കർ നിവാസിൽ സി ജയചന്ദ്രന്റെയും മിനിയുടെയും മകളാണ് രോഹിണി. എം വിഷ്ണു ജഗന്നാഥാണ് ഭർത്താവ്. സഹോദരൻ ശങ്കർ.
Discussion about this post