ന്യൂഡൽഹി: മൊബൈൽ ഫോണുകളിൽ ഉപയോഗിക്കുന്നതിനായി സ്വന്തമായി നിർമ്മിച്ച ഓപ്പറേറ്റിംഗ് സിസ്റ്റവുമായി ഇന്ത്യൻ സാങ്കേതിക ഗവേഷകർ. മദ്രാസ് ഐഐടിയുടെ ഉപസ്ഥാപനമായ ജെ ആൻഡ് കെ ഓപ്പറേഷൻസ് പ്രൈവറ്റ് ലിമിറ്റഡ് വികസിപ്പിച്ചെടുത്ത ഈ ഓപ്പറേറ്റിംഗ് സിസ്റ്റത്തിന് ‘ഭാരത് ഒഎസ്‘ എന്നതിന്റെ ചുരുക്ക രൂപമായി ഭരോസ് എന്നാണ് പേര് നൽകിയിരിക്കുന്നത്.
ഉപഭോക്താക്കൾക്ക്, തങ്ങളുടെ ആവശ്യാനുസരണമുള്ള ആപ്പുകൾ കൂടുതൽ സ്വാതന്ത്ര്യത്തോടെയും നിയന്ത്രണത്തോടെയും ആയാസരഹിതമായും ഉപയോഗിക്കാൻ ഈ ഓപ്പറേറ്റിംഗ് സിസ്റ്റത്തിൽ സാധിക്കുമെന്ന് ഗവേഷകർ അവകാശപ്പെടുന്നു. മൊബൈൽ ഫോണുകളിൽ മതിയായ സുരക്ഷയും സ്വകാര്യതയുടെ സംരക്ഷണവും ഈ ഒഎസ് ഉറപ്പ് നൽകുന്നു.
രഹസ്യസ്വഭാവമുള്ള വിവരങ്ങൾ നിയന്ത്രിതമായ മൊബൈൽ ആപ്പ്ലിക്കേഷനുകൾ വഴി കൈകാര്യം ചെയ്യുന്ന സ്ഥാപനങ്ങൾക്കാണ് ആദ്യ ഘട്ടത്തിൽ ഭരോസ് ഉപയോഗിക്കാൻ സാധിക്കുക. സ്വകാര്യ 5ജി ശൃംഖല ഉപയോഗിച്ച് സ്വകാര്യ ക്ലൗഡ് സേവനങ്ങൾ കൈകാര്യം ചെയ്യുന്ന ഉപയോതാക്കൾക്ക് ഇത് ഉപയോഗിക്കാം.
മദ്രാസ് ഐഐടി സ്ഥാപിച്ച ഐഐടി മദ്രാസ് പ്രവർത്തക് ടെക്നോളജീസ് ഫൗണ്ടേഷൻ ആണ് ജെ ആൻഡ് കെ ഓപ്പറേഷൻസ് പ്രൈവറ്റ് ലിമിറ്റഡ് നിയന്ത്രിക്കുന്നത്. കേന്ദ്ര സർക്കാരാണ് ഫൗണ്ടേഷന് വേണ്ടുന്ന സാമ്പത്തിക പിന്തുണ നൽകുന്നത്. സാങ്കേതിക രംഗത്തെ ഇന്ത്യയുടെ കുതിച്ചു ചാട്ടത്തിന്റെ ഉദാഹരണമായാണ് ഭരോസ് വിശേഷിപ്പിക്കപ്പെടുന്നത്.
കൃത്യമായ ഇടവേളകളിൽ അപ്ഡേറ്റുകൾ നൽകുന്ന ഈ ഓപ്പറേറ്റിംഗ് സിസ്റ്റം, ഓട്ടോ അപ്ഡേറ്റ് സംവിധാനത്തോടെയാണ് ഉപഭോക്താക്കളിലേക്ക് എത്തുക. ഏറ്റവും പുതിയ സെക്യൂരിറ്റി പാച്ചുകളും ബഗ് ഫിക്സുകളും ഇതുവഴി കൃത്യമായി ഉപഭോക്താക്കൾക്ക് ലഭ്യമാകുന്നു. ഇന്ത്യയിൽ ഭരോസ് വിപുലമായി ലഭ്യമാക്കാൻ സ്വകാര്യ മേഖല, സർക്കാർ ഏജൻസികൾ, ടെലികോം സേവന ദാതാക്കൾ എന്നിവയുമായി ചർച്ചകൾ ആരംഭിച്ചു കഴിഞ്ഞതായി മദ്രാസ് ഐഐടി പ്രസ്താവനയിലൂടെ അറിയിച്ചു.
Discussion about this post