ആഗോള പ്രതിസന്ധിക്കിടയിലും ഇന്ത്യ ശോഭിക്കുകയാണ്; തകർന്നുകൊണ്ടിരിക്കുന്ന ലോകത്തിന് നരേന്ദ്ര മോദിയുടെ നേതൃത്വം നിർണായകമാണ്; പ്രശംസിച്ച് ഡബ്ല്യുഇഎഫ് ചെയർമാൻ

ന്യൂഡൽഹി : പ്രധാനമന്ത്രി നരേന്ദ്ര മോദിയുടെ നേതൃപാഠവത്തെ പ്രശംസിച്ച് വേൾഡ് ഇക്കണോമിക് ഫോറം സ്ഥാപകനും എക്‌സിക്യൂട്ടീവ് ചെയർമാനുമായ ക്ലൗസ് ഷ്വാബ്. ലോകം പ്രതിസന്ധിയിലൂടെ കടന്നുപോകുന്ന കാലഘട്ടത്തിലും ഇന്ത്യ തിളങ്ങി നിൽക്കുകയാണെന്ന് അദ്ദേഹം പറഞ്ഞു. ഈ ലോകത്തിന് നരേന്ദ്ര മോദിയുടെ നേതൃത്വം നിർണായകമാണെന്നും ഷ്വാബ് കൂട്ടിച്ചേർത്തു.

നീതിയും തുല്യവുമായ വളർച്ച പ്രോത്സാഹിപ്പിക്കുന്നതോടൊപ്പം സമ്മർദ്ദകരമായ ആഭ്യന്തര കാര്യങ്ങളിൽ വ്യക്തമായ പുരോഗതിയും രാജ്യം കൈവരിക്കുന്നുണ്ടെന്ന് ഷ്വാബ് പറഞ്ഞു. ഡബ്ല്യുഇഎഫ് വാർഷിക യോഗത്തിനോടനുബന്ധിച്ച് നടന്ന പരിപാടിയിൽ പങ്കെടുത്ത് സംസാരിക്കുകയായിരുന്നു അദ്ദേഹം.

കൃത്യസമയത്താണ് ഇന്ത്യയ്ക്ക് ജി20 പ്രസിഡന്റ് സ്ഥാനം ലഭിച്ചത്. തകർന്നുകൊണ്ടിരിക്കുന്ന ലോകത്തിന് പ്രധാനമന്ത്രിയുടെ നേതൃത്വം നിർണായകമാണ്. ഇന്ത്യയുമായുള്ള 40 വർഷത്തെ സഹകരണ ചരിത്രത്തെ വിലമതിക്കുന്നതായും നരേന്ദ്ര മോദിയുടെ നേതൃത്വത്തിൽ ജി20 പ്രസിഡന്റ് സ്ഥാനം ഇന്ത്യ ഏറ്റെടുത്ത സാഹചര്യത്തിൽ രാജ്യവുമായി തുടർന്നും സഹകരണം പ്രതീക്ഷിക്കുന്നതായും ഡബ്ല്യുഇഎഫ് വ്യക്തമാക്കി.