ആൾക്കൂട്ടത്തിലും വ്യക്തിപരമായും ആളുകളോട് നന്നായി ഇടപഴകാൻ കഴിയുക, സംസാരിക്കാൻ കഴിയുക എന്നതാണ് സംരംഭകത്വത്തിലേക്ക് കടക്കുന്നതിനുള്ള ആദ്യപടി. നല്ല ആശയവിനിമയം ഉള്ള ഒരു വ്യക്തിക്ക് മാത്രമേ മികച്ച രീതിയിൽ തങ്ങളുടെ ബിസിനസ് മുന്നോട്ട് കൊണ്ട് പോകാൻ കഴിയൂ. എന്നാൽ സോഷ്യൽ ഫോബിയ പലർക്കും വിലങ്ങുതടിയാകുന്നു.ആളുകളെല്ലാം നമ്മളെ ശ്രദ്ധിക്കുകയാണ് എന്ന ധാരണയാണ് സോഷ്യൽ ഫോബിയയുടെ പ്രധാന കാരണം. എന്നാൽ യാഥാർത്ഥ്യം മറിച്ചാണ് താനും
ഒരു വ്യക്തിയെ സാമൂഹികമായ ജീവിതത്തിൽ നിന്നും വിജയത്തിൽ നിന്നും പിന്തിരിപ്പിക്കുന്ന ഘടകമാണ് സോഷ്യൽ ഫോബിയ. ഒരു കാര്യവും ഇല്ലാതെ സമൂഹത്തോട് ഒരു ഭയം തോന്നുന്ന അവസ്ഥയാണ് ഇത്.ഒരു സംരംഭകൻ സംബന്ധിച്ചിടത്തോളം തീർത്തും അനാവശ്യമായ ഒരു കാര്യമാണിത്. കുറേ ആളുകളെ കാണുമ്പോൾ പേടി തോന്നുക അല്ലെങ്കിൽ ആളുകളോട് ഇടപഴകാൻ ഭയം തോന്നുക ഇവയെല്ലാം സോഷ്യൽ ഫോബിയയുടെ സൂചനകളാണ്.
സംരംഭം വിജയകരമായി മുന്നോട്ട് കൊണ്ട് പോകുന്നതിൽ നിന്നും ഒരു വ്യക്തിയെ പിന്തിരിപ്പിക്കുന്ന ഘടകമാണിത്.മാനസികമായ ഒരു പ്രശ്നമാണിത്. എന്നാൽ ഒരു വ്യക്തി സ്വയം മനസുവച്ചാൽ ഇത് മറികടക്കാൻ സാധിക്കും.സോഷ്യൽ ഫോബിയ ഉണ്ടാകുന്നത് നമുക്ക് മുൻപുണ്ടായ അനുഭവത്തിന്റെ ഭാഗമായിട്ടാണ്. പക്ഷേ നമ്മൾ തിരിച്ചറിയേണ്ട കാര്യം എന്നുപറയുന്നത്, ഇങ്ങനെ ഒരു ഭയം എല്ലാവരിലും ചെറിയ തോതിലെങ്കിലും ഉണ്ടെന്നുള്ളതാണ്.
ഒരു പുതിയ സാഹചര്യം അല്ലെങ്കിൽ വ്യത്യസ്ത സാഹചര്യം, പുതിയ ആളുകൾ എന്നീ സന്ദർഭങ്ങളിലെല്ലാം ചെറിയ തോതിലെങ്കിലും എല്ലാവർക്കും തോന്നുന്ന ഒന്നാണ് ഇത്. ആളുകളെല്ലാം നമ്മളെ ശ്രദ്ധിക്കുകയാണ് എന്ന ധാരണയാണ് പ്രധാന കാരണം. ആർക്കും ആരെയും ശ്രദ്ധിക്കാൻ സമയമില്ല എന്നതാണ് യാഥാർത്ഥ്യം. അതിജീവിക്കുന്നതിനുള്ള കഴിവ് സ്വയം വളർത്തിയെടുക്കുക എന്നതാണ് ഇക്കാര്യത്തിൽ ഏറ്റവും അനിവാര്യം. ആൾക്കൂട്ടത്തെ സധൈര്യം നേരിടുക, കൂടുതൽ സംസാരിക്കുക, ആളുകളെ ഫേസ് ചെയ്യുക എന്നിവയാണ് ഈ അവസ്ഥ മറികടക്കാൻ ആദ്യം ചെയ്യേണ്ടത്. ഇതിനു സ്വയം തയ്യാറെടുക്കുകയും വേണം.
Discussion about this post