കാലാകാലങ്ങളായി ഒരു ഘട്ടത്തില് എല്ലാ കുട്ടികളുടെയും ഉള്ളിലുണ്ടാകുന്ന സംശയം തന്നെയാണ് പത്തുവയസുകാരിയായ സ്കാര്ലെറ്റ് ഡിമാറ്റോയ്ക്കും തോന്നിയത്. സാന്താക്ലോസ് സത്യമാണോ അതോ വെറും കെട്ടുകഥയോ. പക്ഷേ എല്ലാ കുട്ടികളെയും പോലെ ആ സംശയം അങ്ങനെ വെറുതേ വിട്ടുകളയാന് അവള് തയ്യാറായില്ല. ശാസ്ത്രം ഇത്രയേറെ പുരോഗമിച്ച ഈ ലോകത്ത് ഇതൊക്കെ തെളിയിക്കുന്നത് നിസ്സാരമല്ലേ. അതിന് അവള് ഒരു വഴിയും കണ്ടെത്തി. സാന്താക്ലോസിന്റെ അസ്തിത്വം കണ്ടെത്താന് ഡിഎന്എ ടെസ്റ്റ് നടത്തുക. പിന്നെ ഒട്ടും വൈകിയില്ല, തന്റെ ആവശ്യം അവള് ജനങ്ങളെ സഹായിക്കാന് ബാധ്യതയുള്ള പോലീസിനെ അറിയിക്കുകയും ചെയ്തു.
അമേരിക്കന് മാധ്യമമായ ‘എന്പിആറി’ന്റെ റിപ്പോര്ട്ട് അനുസരിച്ച്, പത്തുവയസുകാരിയായ ക്യുക്കമ്പര്ലന്ഡുകാരി സ്കാര്ലെട്ട് ക്രിസ്തുമസ് ആഘോഷം കഴിഞ്ഞ് ബാക്കി വന്ന ക്യാരറ്റും കുക്കികളും ഉപയോഗിച്ച് സാന്താക്ലോസിന്റെ ഡിഎന്എ പരിശോധിക്കണമെന്ന് ആവശ്യപ്പെട്ട് ലോക്കല് പോലീസിന് കത്തയക്കുകയായിരുന്നു.
‘ക്രിസ്തുമസ് ദിനത്തില് സാന്റയ്ക്കും മാനിനും വേണ്ടി ബാക്കിവെച്ച കുക്കിയുടെയും ക്യാരറ്റുകളുടെയും സാമ്പിളുകള് ഞാന് എടുത്തുവെച്ചിട്ടുണ്ട്. അതില് നിന്ന് നിങ്ങള്ക്ക് ഡിഎന്എ സാമ്പിള് എടുത്ത് സാന്റ യഥാര്ത്ഥത്തില് ഉണ്ടോയെന്ന് കണ്ടെത്താന് കഴിയുമോ?’ എന്നാണ് ആ മിടുക്കി കത്തില് പോലീസിനോട് ആവശ്യപ്പെട്ടിരിക്കുന്നത്. അവള് താന് ശേഖരിച്ച തെളിവ് അവിടുത്തെ ഹെല്ത്ത്-ഫോറന്സിക് സയസന്സ് യൂണിറ്റിന് അയച്ച് കൊടുക്കുകയും ചെയ്തു.
കുട്ടിക്ക് പോലീസ് വളരെ ഹൃദ്യമായ മറുപടി നല്കി. മാത്രമല്ല,
അവള് നല്കിയ തെളിവുകള് റോഡ് ദ്വീപിലെ ഹെല്ത്ത് ഡിപ്പാര്ട്ട്മെന്റിലേക്ക് അയച്ച് ഡിഎന്എ പരിശോധന നടത്തുകയും ചെയ്തു. സ്കാര്ലെട്ടിന്റെ തെളിവുകളും പരിശോധന റിപ്പോര്ട്ടുകളും പോലീസിന്റെ ഔദ്യോഗിക ഫേസ്ബുക്ക് പേജില് അവര് പങ്കുവെക്കുകയും ചെയ്തു. ക്രിസ്തുമസ് മാജിക് ഇപ്പോഴും ജീവനോടെ ഉണ്ടെന്ന അടിക്കുറിപ്പോടെ മേയറുടെ ഓഫീസും ആ പോസ്റ്റ് ഷെയര് ചെയ്തു.
