ചെന്നൈ: തമിഴിലിൽ റിലീസിനൊരുങ്ങുന്ന ചിത്രം മാളികപ്പുറത്തിന് ആശംസകൾ നേർന്ന് രജനികാന്തിന്റെ മകൾ സൗന്ദര്യ രജനികാന്ത്. ചിത്രത്തെക്കുറിച്ച് മികച്ച പ്രതികരണമാണ് വ്യാപകമായി ലഭിക്കുന്നതെന്ന് സൗന്ദര്യ പറഞ്ഞു. ട്വിറ്ററിലൂടെയായിരുന്നു സിനിമയ്ക്ക് ആശംസകളുമായി സംവിധായിക കൂടിയായ സൗന്ദര്യ ആശംസ അറിയിച്ചത്.
മാളികപ്പുറം സിനിമയെക്കുറിച്ച് മികച്ച അഭിപ്രായവും ദൈവീകമായ കാര്യങ്ങളുമാണ് നാനാഭാഗത്തു നിന്നും കേൾക്കാൻ കഴിയുന്നത്. ചിത്രം തമിഴിൽ റിലീസ് ചെയ്യാൻ ഒരുങ്ങുന്ന വേളയിൽ ചിത്രത്തിന്റെ തിരക്കഥാകൃത്ത് അഭിലാഷിനും മറ്റ് അണിയറ പ്രവർത്തകർക്കും ആശംസകൾ അറിയിക്കുന്നു. ശരണം അയ്യപ്പ- സൗന്ദര്യ ട്വിറ്ററിൽ കുറിച്ചു. തമിഴിൽ റിലീസിനൊരുങ്ങുന്ന ചിത്രത്തിന്റെ പോസ്റ്ററും പങ്കുവച്ചിട്ടുണ്ട്.
ഈ മാസം 26നാണ് ചിത്രം തമിഴിൽ റിലീസ് ചെയ്യുന്നത്. തമിഴിന് പുറമേ തെലുങ്ക്, കന്നഡ പതിപ്പുകളും റിലീസ് ചെയ്യുന്നുണ്ട്. തമിഴ്നാട്, കർണാടക, ആന്ധ്രാപ്രദേശ് എന്നീ സംസ്ഥാനങ്ങളിൽ നിന്നും ധാരാളം അയ്യപ്പ ഭക്തരാണ് ശബരിമലയിൽ ദർശനം നടത്താനായി എത്താറുള്ളത്. ഈ സാഹചര്യത്തിലാണ് ചിത്രം മൂന്ന് സംസ്ഥാനങ്ങളിലും മൊഴിമാറ്റി റിലീസ് ചെയ്യുന്നത്.
അതേസമയം വിദേശരാജ്യങ്ങളിലും ചിത്രത്തിന് വലിയ പ്രേക്ഷക പ്രീതിയാണ് ലഭിക്കുന്നത്. നിലവിൽ 50 കോടി പിന്നിട്ട ചിത്രം അധികം വൈകാതെ നൂറ് കോടി കടക്കുമെന്നാണ് പ്രതീക്ഷിക്കുന്നത്.
Discussion about this post