ടെഹ്രാൻ: ഇറാനിലെ ഇസ്ഫാഹൻ സൈനിക കേന്ദ്രത്തിൽ ശക്തമായ സ്ഫോടനം. സൈനിക കേന്ദ്രത്തെ ലക്ഷ്യമിട്ട ഡ്രോൺ ആക്രമണ ശ്രമം സൈന്യം പരാജയപ്പെടുത്തിയതാണെന്ന് ഇറാൻ പ്രതിരോധ വൃത്തങ്ങൾ അറിയിച്ചു.
മൂന്ന് ഡ്രോണുകളാണ് സൈനിക കേന്ദ്രത്തെ ലക്ഷ്യമാക്കി എത്തിയത്. ഇതിൽ ഒരെണ്ണം വ്യോമ പ്രതിരോധ സംവിധാനം ഉപയോഗിച്ച് തകർത്തു. മറ്റ് രണ്ടെണ്ണവും നിലം തൊടുന്നതിന് മുൻപ് സൈന്യം കത്തിച്ച് ചാരമാക്കിയതായി ഇറാൻ പ്രതിരോധ മന്ത്രാലയം അറിയിച്ചു. സ്ഫോടനത്തിൽ ആർക്കും പരിക്കില്ല. സൈനിക താവളത്തിന്റെ മേൽക്കൂരയ്ക്ക് കേടുപാടുകൾ സംഭവിച്ചതായും മന്ത്രാലയം വാർത്താ കുറിപ്പിൽ അറിയിച്ചു.
കഴിഞ്ഞ ജൂലൈയിൽ ഇസ്ഫാഹനിലെ സൈനിക താവളത്തിൽ ആക്രമണം നടത്താനെത്തിയ സായുധ സംഘത്തെ പിടികൂടിയതായി ഇറാൻ പ്രതിരോധ മന്ത്രാലയം അവകാശപ്പെട്ടിരുന്നു. കുർദുകളാണ് പിടിയിലായത്. അവരെ അയച്ചത് ഇസ്രയേൽ ആണെന്നും ഇറാൻ ആരോപിച്ചിരുന്നു.
