ന്യൂഡൽഹി; മൊബൈൽ സേവന ദാതാക്കളായ വൊഡാഫോൺ ഐഡിയയ്ക്കെതിരെ ട്വിറ്ററിലൂടെ രംഗത്തെത്തി ജെറ്റ് എയർവേയ്സ് സിഇഒ. കമ്പനിയുടെ മോശം സേവനത്തിനെതിരെയും കസ്റ്റമർ കെയർ സർവ്വീസിൽ നിന്നുളള തുടർച്ചയായ വിളികൾക്കെതിരെയുമാണ് പരസ്യ പോസ്റ്റുമായി ജെറ്റ് എയർവേയ്സ് സിഇഒ സഞ്ജീവ് കപൂർ രംഗത്തെത്തിയത്.
പ്രിയപ്പെട്ട വിഐ കസ്റ്റമർ കെയർ കണക്ഷൻ മാറ്റരുതെന്ന് പറഞ്ഞ് എന്നെ തുടർച്ചയായി ഇങ്ങനെ വിളിക്കുന്നത് ദയവായി നിർത്തണം എന്നായിരുന്നു സഞ്ജീവ് കപൂറിന്റെ പോസ്റ്റ്. ഒൻപത് വർഷത്തിന് ശേഷം അദ്ദേഹം വൊഡാഫോൺ ഐഡിയ കണക്ഷൻ ഉപേക്ഷിക്കാൻ തീരുമാനിച്ചതോടെയാണ് തുടർച്ചയായ വിളിയെത്തിയത്.
രാജ്യത്തിന് അകത്ത് പല ഭാഗങ്ങളിലും മോശം കവറേജാണ് കമ്പനിക്കുളളതെന്ന് സഞ്ജീവ് കപൂർ പറയുന്നു. ചില രാജ്യങ്ങളിലെ ഇന്റർനാഷണൽ റോമിങ് പ്ലാനുകളും നിലവാരമില്ലാത്തതാണ്. തുടർന്നാണ് തന്റെ തീരുമാനമെന്നും ഇക്കാര്യം നേരത്തെ തന്നെ വൊഡാഫോൺ ഐഡിയ കമ്പനിയെ അറിയിച്ചതാണെന്നും അദ്ദേഹം ട്വീറ്റിൽ വ്യക്തമാക്കുന്നുണ്ട്.
എന്നാൽ കമ്പനിയെ ന്യായീകരിച്ച് വൊഡാഫോൺ കസ്റ്റമർ കെയറും ട്വിറ്ററിലൂടെ രംഗത്തെത്തി. അദ്ദേഹത്തിന്റെ പ്രശ്നം പരിഹരിക്കാൻ ഉദ്ദേശിച്ചാണ് കൂടുതൽ തവണ വിളിക്കേണ്ടി വന്നതെന്ന് ആയിരുന്നു കമ്പനിയുടെ മറുപടി. എന്നാൽ അത് വേണ്ടെന്നും അക്കാര്യമാണ് താൻ തന്റെ ട്വീറ്റിലൂടെ പറഞ്ഞതെന്നും സഞ്ജീവ് കപൂർ മറുപടി നൽകി. കഴിഞ്ഞ ദിവസം മുതൽ ഡസൻ കണക്കിന് കോളുകളാണ് തനിക്ക് വരുന്നതെന്നും അദ്ദേഹം പറഞ്ഞു.
Discussion about this post