കൊച്ചി: ശിവരാതി ആഘോഷങ്ങൾ കണക്കിലെടുത്ത് ആലുവയിൽ രണ്ട് ദിവസം മദ്യശാലകൾക്ക് നിയന്ത്രണം. ബീയർ- വൈൻ പാർലറുകൾ ഉൾപ്പെടെ ഉള്ളവയ്ക്ക് നിയന്ത്രണമുണ്ട്. 18ന് രാവിലെ 6.00 മുതൽ 19ന് ഉച്ചയ്ക്ക് 2.00 മണി വരെ മദ്യശാലകൾ തുറക്കരുതെന്ന് കളക്ടർ നിർദേശം നൽകി.
അപകടങ്ങളോ ക്രമസമാധാന പ്രശ്നങ്ങളോ ഇല്ലാതെ ശിവരാത്രി മഹോത്സവം പൂർത്തിയാക്കുന്നതിന് എല്ലാവരുടെയും സഹായം അഭ്യർത്ഥിക്കുകയാണെന്ന് കളക്ടർ അറിയിച്ചു. കൊവിഡ് നിയന്ത്രണങ്ങൾ ഇല്ലാത്തതിനാൽ ആലുവ മണപ്പുറത്ത് ശിവരാത്രി ആഘോഷങ്ങൾ പൂർവാധികം ഭംഗിയായി നടത്താൻ സാധിക്കുമെന്നാണ് പ്രതീക്ഷിക്കുന്നതെന്ന് ദേവസ്വം ബോർഡ് അറിയിച്ചു.
ബലി തർപ്പണത്തിനായുള്ള ഒരുക്കങ്ങൾ പൂർത്തിയായി. സുരക്ഷ കണക്കിലെടുത്ത് ആയിരത്തിലധികം പോലീസുകാരെ പട്ടണത്തിൽ വിന്യസിക്കും. കെ എസ് ആർ ടി സി 210 സ്പെഷ്യൽ സർവീസുകൾ നടത്തും.
ആലുവയിലേക്ക് പ്രത്യേക ട്രെയിൻ സർവീസുകളും ശിവരാത്രി പ്രമാണിച്ച് അനുവദിച്ചിട്ടുണ്ട്. കൊച്ചി മെട്രോ അധിക സർവീസ് നടത്തും. സ്വകാര്യ ബസുകൾക്ക് പ്രത്യേക പെർമിറ്റും നൽകിയിട്ടുണ്ട്. ശിവരാത്രി ദിവസം ക്ഷേത്രത്തിൽ എത്തുന്നവർക്ക് അന്നദാനവും ഉണ്ടായിരിക്കും.
