ഇസ്ലാമബാദ്; പാകിസ്താൻ ഇപ്പോൾ തന്നെ പാപ്പരായിക്കഴിഞ്ഞുവെന്ന് പ്രതിരോധ മന്ത്രി ഖവാജ ആസിഫ്. സിയാൽകോട്ടിൽ നടന്ന ഒരു പൊതുപരിപാടിക്കിടെയാണ് ഖവാജയുടെ പരാമർശം. ഇപ്പോൾ തന്നെ പാകിസ്താൻ വലിയ രീതിയിൽ കുടിശിക വരുത്തിയിട്ടുണ്ടെന്നും, നിലവിലെ സാമ്പത്തിക പ്രതിസന്ധിക്ക് കാരണം ഇതുവരെ രാജ്യം മാറി മാറി ഭരിച്ച രാഷ്ട്രീയക്കാരാണെന്നും ഖവാജ ആസിഫ് കുറ്റപ്പെടുത്തി.
” പാകിസ്താൻ പാപ്പരാവുകയാണെന്നോ, തകർച്ച നേരിട്ടു കൊണ്ടിരിക്കുകയാണെന്നോ ഒക്കെ നിങ്ങൾ കേട്ടിട്ടുണ്ടാകും. പക്ഷേ യഥാർത്ഥത്തിൽ അത് സംഭവിച്ച് കഴിഞ്ഞിരിക്കുകയാണ്. പാപ്പരായ ഒരു രാജ്യത്താണ് നിങ്ങൾ ജീവിക്കുന്നത്. ഈ രാജ്യത്തെ പ്രശ്നങ്ങൾക്ക് പരിഹാരം ഒരിക്കലും ഐഎംഎഫിന്റെ പക്കലല്ല ഉള്ളത്. പ്രശ്നത്തിനെല്ലാമുള്ള പരിഹാരം രാജ്യത്തിനകത്ത് തന്നെയാണുള്ളത്.
നിയമവും ഭരണഘനയുമൊന്നും ആരും പാലിക്കുന്നില്ല. നിലവിലെ സാമ്പത്തിക തകർച്ചയ്ക്ക് ഉത്തരവാദികൾ രാഷ്ട്രീയക്കാരും ഇവിടം മാറി മാറി ഭരിച്ചവരാണ്. ഞാൻ എന്റെ രാഷ്ട്രീയജീവിതത്തിലെ ഭൂരിഭാഗം സമയവും പ്രതിപക്ഷത്തായിരുന്നു. കഴിഞ്ഞ 32 വർഷമായി ഇവിടം ഭരിച്ചവർ രാജ്യത്തെ ലോകത്തിന് മുന്നിൽ നാണം കെടുത്തുന്ന കാഴ്ചകളാണ് ഞാൻ കണ്ടുകൊണ്ടിരുന്നതെന്നും” ഖവാജ ആസിഫ് ആരോപിച്ചു.
Discussion about this post