രണ്ട് ദിവസം നീണ്ടുനിന്ന ബ്രിക്സ് (BRICS) പാർലമെന്ററി ഫോറം സമാപന യോഗത്തിൽ ഭീകരവാദത്തിനെതിരെയും അന്താരാഷ്ട്ര നിയമലംഘനങ്ങൾക്കെതിരെയും നിർണ്ണായക പ്രഖ്യാപനം നടത്തി അംഗരാജ്യങ്ങൾ. 2025 ഏപ്രിൽ 22-ന് ജമ്മു കശ്മീരിലെ പഹൽഗാമിൽ 26 പേരുടെ മരണത്തിനിടയാക്കിയ ദാരുണമായ ഭീകരാക്രമണത്തെ സംയുക്ത പ്രഖ്യാപനത്തിലൂടെ ഫോറം കടുത്ത ഭാഷയിൽ അപലപിച്ചു. ഏത് രൂപത്തിലുള്ള ഭീകരപ്രവർത്തനങ്ങളെയും വച്ചുപൊറുപ്പിക്കില്ലെന്നും, അതിർത്തി കടന്നുള്ള ഭീകരവാദം, ഭീകരവാദ ഫണ്ടിംഗ്, ഭീകരർക്ക് സുരക്ഷിത താവളമൊരുക്കൽ എന്നിവയ്‌ക്കെതിരെ വിട്ടുവീഴ്ചയില്ലാത്ത പോരാട്ടം തുടരുമെന്നും ലോക്‌സഭാ സ്പീക്കർ ഓം ബിർള പ്രഖ്യാപിച്ച സംയുക്ത പ്രസ്താവനയിൽ വ്യക്തമാക്കി.
ഭീകരവാദത്തിന് യാതൊരുവിധ ഇരട്ടത്താപ്പുകളും പാടില്ലെന്നും അതിനെ ഒരു പ്രത്യേക മതവുമായോ ദേശീയതയുമായോ വംശീയതയുമായോ ബന്ധിപ്പിക്കരുതെന്നും സമ്മേളനം ആവശ്യപ്പെട്ടു. ലോകത്ത് സമാധാനവും സ്ഥിരതയും കൈവരിക്കാൻ ഐക്യരാഷ്ട്രസഭയും രക്ഷാസമിതിയും (UNSC) സമഗ്രമായി പരിഷ്കരിക്കേണ്ടതുണ്ടെന്ന് ബ്രിക്സ് പാർലമെന്ററി ഫോറം ചൂണ്ടിക്കാട്ടി. കൂടുതൽ ജനാധിപത്യപരവും തുല്യതയുള്ളതുമായ ആഗോള ക്രമം നിലവിൽ വരണമെങ്കിൽ രക്ഷാസമിതിയിൽ പുതിയ യാഥാർത്ഥ്യങ്ങൾ ഉൾക്കൊള്ളുന്ന മാറ്റങ്ങൾ അടിയന്തിരമായി നടപ്പിലാക്കണമെന്നും പ്രഖ്യാപനത്തിൽ പറയുന്നു. ഏകപക്ഷീയമായി ചുമത്തുന്ന സാമ്പത്തിക ഉപരോധങ്ങൾ ജനങ്ങളുടെ അടിസ്ഥാന മനുഷ്യാവകാശങ്ങളെയും വികസനത്തെയും പ്രതികൂലമായി ബാധിക്കുന്നുവെന്നും യോഗം വിലയിരുത്തി.
പടിഞ്ഞാറൻ ഏഷ്യയിലെ (West Asia) വൻ സംഘർഷത്തിലും സിവിലിയന്മാർക്ക് നേരെ നടക്കുന്ന ആക്രമണങ്ങളിലും ഫോറം കടുത്ത ആശങ്ക രേഖപ്പെടുത്തി. ഇസ്രായേൽ-പലസ്തീൻ തർക്കത്തിന് രണ്ട് സ്വതന്ത്ര രാജ്യങ്ങൾ എന്ന തത്വത്തിൽ (Two-State Solution) അധിഷ്ഠിതമായ ശാശ്വത പരിഹാരം ഉണ്ടാകണമെന്ന് അംഗരാജ്യങ്ങൾ ആവശ്യപ്പെട്ടു. പലസ്തീൻ ജനതയുടെ സ്വയം നിർണ്ണയാവകാശത്തെയും പരമാധികാര സ്വാതന്ത്ര്യത്തെയും പിന്തുണയ്ക്കുന്നതായി യോഗം വ്യക്തമാക്കി. ഇന്ത്യ, ബ്രസീൽ, റഷ്യ, ചൈന, ഈജിപ്ത്, എത്യോപ്യ, ഇന്തോനേഷ്യ, ദക്ഷിണാഫ്രിക്ക എന്നിവയ്‌ക്കൊപ്പം സംഘർഷ മേഖലയിൽ നേരിട്ട് ഉൾപ്പെട്ടിട്ടുള്ള ഇറാൻ, യു.എ.ഇ എന്നീ രാജ്യങ്ങളും ഉൾപ്പെടുന്നതാണ് നിലവിലെ ബ്രിക്സ് കൂട്ടായ്മ.
ഇതിനുപുറമെ, കാലാവസ്ഥാ വ്യതിയാനത്തിനെതിരെ പാരിസ് കരാർ പ്രകാരമുള്ള നടപടികൾ ശക്തമാക്കാനും എഐ (AI) അടക്കമുള്ള പുതിയ സാങ്കേതികവിദ്യകൾ സുരക്ഷിതമായും നീതിയുക്തമായും സാമ്പത്തിക-സാമൂഹിക പുരോഗതിക്കായി ഉപയോഗിക്കാനും അംഗരാജ്യങ്ങൾ തമ്മിൽ ധാരണയായി. ഓരോ രാജ്യത്തിന്റെയും ആഭ്യന്തര കാര്യങ്ങളിൽ മറ്റ് രാജ്യങ്ങൾ ഇടപെടരുതെന്ന തത്വത്തിന് അടിവരയിട്ടുകൊണ്ടാണ് രണ്ടുദിവസത്തെ ഉച്ചകോടി സമാപിച്ചത്.
