മാലിദ്വീപ് പ്രസിഡന്റ് മുഹമ്മദ് മുയിസു അടുത്തിടെ നടത്തിയ മൂന്ന് ദിവസത്തെ പാകിസ്ഥാൻ സന്ദർശനവും ഇരുരാജ്യങ്ങളും തമ്മിൽ ഒപ്പുവെച്ച സുപ്രധാന ധാരണാപത്രങ്ങളും ഇന്ത്യൻ മഹാസമുദ്ര മേഖലയിൽ (IOR) ഭാരതത്തിന്റെ സുരക്ഷാ താൽപ്പര്യങ്ങൾക്ക് ഭീഷണിയാകുന്നതായി വിലയിരുത്തൽ. വിദേശനയത്തിൽ ഇന്ത്യയ്ക്ക് പകരമായി മുസ്ലീം ഭൂരിപക്ഷ രാജ്യങ്ങളുമായും പാകിസ്ഥാനുമായും അടുത്തുനിൽക്കാനുള്ള മാലിദ്വീപിന്റെ നീക്കങ്ങൾ ഇന്ത്യ അതീവ ജാഗ്രതയോടെയാണ് കാണുന്നത്. പരമാധികാരത്തിന്റെ പേരിൽ ഇന്ത്യയുടെ സുരക്ഷയെ ബാധിക്കുന്ന തീരുമാനങ്ങൾ എടുത്താൽ ശക്തമായ തിരിച്ചടി നേരിടേണ്ടി വരുമെന്ന ‘റെഡ് ലൈൻ’ (Red Line) മാലിദ്വീപിന് മുന്നിൽ ഇന്ത്യ വ്യക്തമായി വരയ്ക്കണമെന്ന് ഒബ്‌സർവർ റിസർച്ച് ഫൗണ്ടേഷനിലെ (ORF) അസോസിയേറ്റ് ഫെല്ലോ ആദിത്യ ഗൗഡര ശിവമൂർത്തി ചൂണ്ടിക്കാണിക്കുന്നു.
പാകിസ്ഥാൻ സന്ദർശനത്തിനിടെ സാമൂഹിക-സാമ്പത്തിക വികസനം, സൈബർ സുരക്ഷ, ലഹരിക്കടത്ത് തടയൽ, പ്രതിരോധം, മാരിടൈം സുരക്ഷ തുടങ്ങിയ മേഖലകളിലായി 20 ധാരണാപത്രങ്ങളിലാണ് (MoUs) മാലിദ്വീപും പാകിസ്ഥാനും ഒപ്പുവെച്ചത്. ഉഭയകക്ഷി വ്യാപാരം നിലവിലെ 13 ദശലക്ഷം ഡോളറിൽ നിന്ന് 200 ദശലക്ഷം ഡോളറിലേക്ക് ഉയർത്താനും ഇരുരാജ്യങ്ങളും ലക്ഷ്യമിടുന്നുണ്ട്. പാകിസ്ഥാൻ സൈനിക മേധാവി ഫീൽഡ് മാർഷൽ അസിം മുനീറുമായി മുയിസു നടത്തുന്ന കൂടിയാഴ്ചകളും ചർച്ചകളും മാലിദ്വീപിന്റെ സുരക്ഷാ മേഖലയിലേക്ക് പാകിസ്ഥാൻ കടന്നുവരുന്നതിന്റെ വ്യക്തമായ സൂചനയാണെന്നും ഇത് ഇന്ത്യയുടെ അയൽപക്ക സുരക്ഷയ്ക്ക് വലിയ ഭീഷണിയാണെന്നും വിലയിരുത്തപ്പെടുന്നു.
അടുത്തിടെ പാകിസ്ഥാന് പുറമെ ചൈന, തുർക്കി തുടങ്ങിയ രാജ്യങ്ങളുമായും മാലിദ്വീപ് പ്രതിരോധ കരാറുകളിൽ ഏർപ്പെട്ടിട്ടുണ്ട്. തുർക്കിയിൽ നിന്ന് ഡ്രോണുകളും യുഎഇയിൽ നിന്ന് കവചിത വാഹനങ്ങളും മാലിദ്വീപ് സ്വന്തമാക്കിയിരുന്നു. എന്നാൽ സാമ്പത്തിക പ്രതിസന്ധിയിൽ വലയുന്ന മാലിദ്വീപിനെ സാമ്പത്തികമായി എന്നും തുണച്ചത് ഇന്ത്യയാണ്. മുൻപ് നൽകിയ ട്രഷറി ബില്ലുകളുടെ തീയതി നീട്ടിനൽകിയും, 4,850 കോടിയുടെ ക്രെഡിറ്റ് ലൈനുകളും 400 മില്യൺ ഡോളറിന്റെയും 30 ബില്യൺ രൂപയുടെയും കറൻസി സ്വപ്പ് (Currency Swap) കരാറുകൾ അനുവദിച്ചും ഇന്ത്യ വലിയ സഹായമാണ് മാലിദ്വീപിന് നൽകിയത്.
മാലിദ്വീപിലെ ആഭ്യന്തര രാഷ്ട്രീയത്തിലും പ്രസിഡന്റ് മുയിസുവിന്റെ ജനപ്രീതിയിലുമുണ്ടാകുന്ന ഇടിവ് കണക്കിലെടുത്ത് ഇന്ത്യ ഇതുവരെ അയഞ്ഞ സമീപനമാണ് സ്വീകരിച്ചിരുന്നത്. എന്നാൽ ഇന്ത്യയുടെ തന്ത്രപ്രധാന സുരക്ഷാ താൽപ്പര്യങ്ങൾക്ക് മുകളിൽ മാലിദ്വീപ് ഭീഷണി ഉയർത്തുകയാണെങ്കിൽ സാമ്പത്തിക സഹായങ്ങളും സൗകര്യങ്ങളും ഘട്ടംഘട്ടമായി നിർത്തലാക്കുമെന്ന ശക്തമായ സന്ദേശം ന്യൂഡൽഹി നൽകേണ്ട സമയമായി എന്നാണ് നയതന്ത്ര വിദഗ്ദ്ധർ ചൂണ്ടിക്കാണിക്കുന്നത്.
