ഒരു നിമിഷം തെറ്റിയിരുന്നെങ്കിൽ; മരണത്തെ മുഖാമുഖം കണ്ട് വിശാൽ; രക്ഷപ്പെട്ടത് തലനാരിഴയ്ക്ക്; വീഡിയോ

ചെന്നൈ: സിനിമാ ചിത്രീകരണത്തിനിടെ നടന്ന അപകടത്തിൽ നിന്നും തലനാരിഴയ്ക്ക് രക്ഷപ്പെട്ട് തെന്നിന്ത്യൻ ആക്ഷൻ ഹീറോ വിശാൽ. മാർക്ക് ആന്റണി എന്ന പുതിയ ചിത്രത്തിന്റെ സംഘട്ടന രംഗം ചിത്രീകരിക്കുമ്പോഴാണ് അപകടം.

നിറയെ ആളുകളുടെ കൂട്ടത്തിൽ വിശാൽ തറയിൽ കിടക്കുന്ന രംഗമാണ് ചിത്രീകരിക്കുന്നത്. ഇതിനിടെ പുറകുവശത്തുനിന്ന് ഒരു ട്രക്ക് പാഞ്ഞടുക്കുന്നു. ഷൂട്ടിംഗിനിടെ വാഹനത്തിന്റെ നിയന്ത്രണം നഷ്ടപ്പെടുകയായിരുന്നു. ട്രക്ക് മതിൽ തകർത്ത് ക്യാമറ ലക്ഷ്യമാക്കി അതിവേഗത്തിൽ പാഞ്ഞുവരികയായിരുന്നു.

ട്രക്കിനടിയിൽ പെടാതെ തലനാരിഴയ്ക്കാണ് വിശാൽ രക്ഷപ്പെട്ടത്. പെട്ടെന്ന് അടുത്തുണ്ടായിരുന്ന ഒരാൾ വിശാലിനെ വലിച്ചുമാറ്റുകയായിരുന്നു. ജൂനിയർ ആർട്ടിസ്റ്റുകൾ അടക്കം ഓടിമാറിയതിനാൽ വൻ ദുരന്തം ഒഴിവായി.

Jus missed my life in a matter of few seconds and few inches, Thanks to the Almighty

Numb to this incident back on my feet and back to shoot, GB pic.twitter.com/bL7sbc9dOu

— Vishal (@VishalKOfficial) February 22, 2023

ഏതാനും സെക്കന്റുകൾക്കും ഇഞ്ചിനുമുള്ള വ്യത്യാസത്തിൽ തനിക്ക് ജീവൻ നഷ്ടമായേനേ, ദൈവത്തിന് നന്ദി, വീഡിയോ പങ്കുവച്ച് വിശാൽ കുറിച്ചു. മാർക്ക് ആന്റണിയിലെ മറ്റൊരു താരമായ എസ് ജെ സൂര്യയും സംഭവത്തിൽ പ്രതികരിച്ച് വീഡിയോ പങ്കുവച്ചു. ‘നൂലിഴ വ്യത്യാസത്തിൽ ജീവൻ തിരിച്ചുകിട്ടി. ലോറി വെട്ടിച്ചുമാറ്റുന്നതിന് പകരം നേർക്കുതന്നെ എത്തിയിരുന്നെങ്കിൽ വീഡിയോ പങ്കുവയ്ക്കാൻ ഞങ്ങൾ ഇരുവരും ഉണ്ടാകുമായിരുന്നില്ല. ദൈവത്തിന് നന്ദി’ എന്നാണ് താരം കുറിച്ചത്.