വേനലവധിക്ക് എവിടേക്ക് പോകുമെന്ന് കണ്ഫ്യൂഷനടിച്ച് ഇരിക്കുന്നവര്ക്കിതാ ഒരു കിടിലന് ഓഫര്. നേരെ തായ്വാനിലേക്ക് വിട്ടോളൂ. അവിടെപ്പോയാല് ചിലവിനുള്ള കാശ് ഇങ്ങോട്ട് തരും. മൂക്കത്ത് വിരല് വെക്കേണ്ട സംഗതി സത്യമാണ്. സമ്പദ് വ്യവസ്ഥയെ ഉത്തേജിപ്പിക്കാനുള്ള സര്ക്കാര് പദ്ധതികളുടെ ഭാഗമായി ഈ വര്ഷം രാജ്യത്തെത്തുന്ന അഞ്ചുലക്ഷം സഞ്ചാരികള്ക്ക് പണമായോ ഇളവുകളായോ 5,000 തായ്വാനിയന് ഡോളര് (ഏകദേശം 13,656 രൂപ) നല്കാനാണ് തീരുമാനം.
ഈ വമ്പന് ഓഫറിലൂടെ കൂടുതല് അന്താരാഷ്ട്ര സഞ്ചാരികളെ ആകര്ഷിക്കാനാകുമെന്നാണ് തായ്വാന്റെ കണക്കുകൂട്ടല്. 2022ലാണ് തായ്വാന് കോവിഡ് നിയന്ത്രണങ്ങള് എടുത്തുകളഞ്ഞത്. അതിനുശേഷം സമ്പദ് വ്യവസ്ഥയെ പച്ചപിടിപ്പിക്കാനുള്ള വഴികള് തിരയുകയായിരുന്നു രാജ്യം. അന്താരാഷ്ട്ര സഞ്ചാരികളെ തായ്വാനിലേക്ക് വരാന് പ്രോത്സാഹിപ്പിക്കുന്നതിനുള്ള ശ്രമങ്ങളും പദ്ധതികളും കാര്യക്ഷമമാക്കുമെന്ന് പത്രസമ്മേളനത്തില് തായ്വാനിലെ ഗതാഗത ആശയവിനിമയ മന്ത്രാലയം ഡിപ്പാര്ട്മെന്റ് ഡയറക്ടര് ലിന് ഫു-ഷാന് അറിയിച്ചു.
ഈ പദ്ധതിയുടെ ഭാഗമായി എട്ട് സഞ്ചാരികള് അടങ്ങിയ ഒരു സംഘത്തിന് 10,000 തായ്വാനിയന് ഡോളറും (27,096 രൂപ) പതിനഞ്ചുപേര് അടങ്ങിയ ഗ്രൂപ്പിന് 20,000 തായ്വാനിയന് ഡോളറും (54,192 രൂപ) ട്രാവല് എജന്സികള്ക്ക് നല്കാനും തായ്വാന് തീരുമാനിച്ചിട്ടുണ്ട്. റിപ്പോര്ട്ടുകള് അനുസരിച്ച് ടൂറിസം മേഖലയില് പ്രഖ്യാപിച്ചിരിക്കുന്ന ഈ ഓഫറുകള് പ്രത്യേക നിയമത്തിലൂടെ അംഗീകരിച്ച 380 ബില്യണ് തായ്വാനിയന് ഡോളറിന്റെ (ഏകദേശം 1,02,953.1 കോടി രൂപ) ഉത്തേജന പാക്കേജിന്റെ ഭാഗമാണ്.
രാജ്യത്തെ ടൂറിസം ബ്യൂറോയുടെ കണക്കനുസരിച്ച്, കൊറോണയ്ക്ക് മുമ്പ് തായ്വാന്റെ ജിഡിപിയുടെ നാല് ശതമാനം വന്നിരുന്നത് വിനോദസഞ്ചാര മേഖലയില് നിന്നായിരുന്നു. എന്നാല് പകര്ച്ചവ്യാധിയെ തുടര്ന്ന് അതിര്ത്തികള് അടച്ചതോടെ ഈ രംഗം നിശ്ചലമായി. 2019ല് ചൈന തായ്വാന് സന്ദര്ശിക്കുന്നതില് നിന്നും സഞ്ചാരികളെ വിലക്കിയതോടെ സ്ഥിതിഗതികള് തീര്ത്തും മോശമായി.
Discussion about this post