തകർപ്പൻ അർദ്ധ സെഞ്ച്വറിയുമായി ഹർമൻപ്രീത്; മുംബൈയുടെ ബാറ്റിംഗ് വെടിക്കെട്ട്; വനിതാ പ്രീമിയർ ലീഗിന് ആവേശത്തുടക്കം

മുംബൈ: വനിതാ പ്രീമിയർ ലീഗ് പ്രഥമ എഡിഷന് മുംബൈ ഡി വൈ പാട്ടീൽ സ്റ്റേഡിയത്തിൽ ആവേശത്തുടക്കം. ടോസ് നേടി ബൗളിംഗ് തിരഞ്ഞെടുത്ത ഗുജറാത്ത് ജയന്റ്സിനെതിരെ മുംബൈ ഇന്ത്യൻസ് 20 ഓവറിൽ 5 വിക്കറ്റ് നഷ്ടത്തിൽ 207 റൺസ് എന്ന കൂറ്റൻ ടോട്ടൽ പടുത്തുയർത്തി. 30 പന്തിൽ 65 റൺസെടുത്ത ക്യാപ്ടൻ ഹർമൻപ്രീത് കൗറിന്റെ തകർപ്പൻ ഇന്നിംഗ്സായിരുന്നു മുംബൈ ബാറ്റിംഗിന്റെ നട്ടെല്ല്.

ആദ്യം മുതൽ ആക്രമിച്ച് കളിച്ച മുംബൈ ഓപ്പണർ ഹെയ്ലി മാത്യൂസ് 31 പന്തിൽ 47 റൺസെടുത്തു. പിന്നാലെ വന്ന നതാലി സ്കീവർ ബ്രന്റ് 23 റൺസെടുത്തു. അവസാന നിമിഷത്തെ വെടിക്കെട്ടിൽ അമീലിയ കെർ 24 പന്തിൽ 45 റൺസുമായി പുറത്താകാതെ നിന്നു. ഗുജറാത്തിന് വേണ്ടി സ്നേഹ റാണ 2 വിക്കറ്റെടുത്തു.

കൂറ്റൻ സ്കോർ പിന്തുടരുന്ന ഗുജറാത്ത് ബാറ്റിംഗ് തകർച്ചയെ നേരിടുകയാണ്. ആദ്യ ഓവറിൽ സ്റ്റാർ ഓപ്പണറും ക്യാപ്ടനുമായ ബെഥ് മൂണി അക്കൗണ്ട് തുറക്കും മുൻപ് റിട്ടയേർഡ് ഹർട്ട് ആയത് ഗുജറാത്തിന് തിരിച്ചടിയായി. നിലവിൽ 3 ഓവറിൽ 8 റൺസ് ചേർക്കുന്നതിനിടെ അവർക്ക് 3 വിക്കറ്റുകൾ നഷ്ടമായിക്കഴിഞ്ഞു. ഓപ്പണർ മേഘന 2 റൺസുമായും ഹർലീൻ ഡിയോളും ആഷ്ലി ഗാർഡ്നറും പൂജ്യത്തിനും പുറത്തായി. നിലവിൽ 4 റൺസെടുത്ത അന്നബെൽ സതർലാൻഡും ഒരു റണ്ണുമായി ദയാളൻ ഹേമലതയുമാണ് ക്രീസിൽ.