ടഹ്ലിയയുടെ ഒറ്റയാൾ പോരാട്ടം വിഫലം; യുപിക്കെതിരെ ഡൽഹിക്ക് തകർപ്പൻ ജയം

മുംബൈ: വനിതാ പ്രീമിയർ ലീഗിൽ യുപി വാരിയേഴ്സിനെതിരെ ഡൽഹി ക്യാപ്പിറ്റൽസിന് തകർപ്പൻ ജയം. 42 റൺസിനാണ് ഡൽഹി യുപിയെ പരാജയപ്പെടുത്തിയത്. ടോസ് നഷ്ടമായി ബാറ്റിംഗിന് അയക്കപ്പെട്ട ഡൽഹി 20 ഓവറിൽ 4 വിക്കറ്റ് നഷ്ടത്തിൽ 211 റൺസ് അടിച്ച് കൂട്ടി. മറുപടി ബാറ്റിംഗിൽ യുപിയുടെ പോരാട്ടം 20 ഓവറിൽ 5 വിക്കറ്റ് നഷ്ടത്തിൽ 169 റൺസിൽ അവസാനിച്ചു.

42 പന്തിൽ 70 റൺസെടുത്ത ക്യാപ്ടൻ മെഗ് ലാനിംഗ് യുപി ബൗളിംഗിനെ കടന്നാക്രമിച്ചു. അവസാന ഓവറുകളിൽ വെടിക്കെട്ട് തീർത്ത ജൊനാസെൻ 20 പന്തിൽ 42 റൺസുമായും ജമീമ റോഡ്രിഗസ് 22 പന്തിൽ 34 റൺസുമായും പുറത്താകാതെ നിന്നു.

മറുപടി ബാറ്റിംഗിൽ യുപിക്ക് വേണ്ടി ടഹ്ലിയ മക്ഗ്രാത്ത് ഗംഭീര പ്രകടനം കാഴ്ചവെച്ചു. ടഹ്ലിയ 50 പന്തിൽ 90 റൺസുമായി പുറത്താകാതെ നിന്നു. പിന്തുണ നൽകാൻ മറ്റാരും ഇല്ലാതായതോടെ ആ ഒറ്റയാൾ പോരാട്ടം വിഫലമാകുകയായിരുന്നു. യുപിക്ക് വേണ്ടി ക്യാപ്ടൻ അലീസ ഹീലി 24 റൺസും ദേവിക വൈദ്യ 23 റൺസും നേടി.

ഡൽഹിക്ക് വേണ്ടി ജെസ് ജൊനാസൻ 3 വിക്കറ്റെടുത്തു.