സൗരയൂഥത്തെ കുറിച്ചുള്ള നമ്മുടെ അറിവുകള് ദിനംപ്രതി വര്ധിച്ചുവരികയാണ്. അതിനനുസരിച്ച് സൗരയൂഥം എങ്ങനെ ഉണ്ടായെന്നും പിന്നീടുള്ള പരിണാമവും സംബന്ധിച്ച ഗവേഷങ്ങളും ശാസ്ത്രലോകത്ത് തകൃതിയായി നടക്കുന്നു.പക്ഷേ സൂര്യനും സൂര്യനെ ചുറ്റുന്ന എട്ട് ഗ്രഹങ്ങളും അടങ്ങിയ സൗരയൂഥത്തെ കുറിച്ചുള്ള മനുഷ്യന്റെ അറിവില് എപ്പോഴും വിടവുകള് ഉണ്ടായിട്ടുണ്ട്. ഈ വിടവുകളിലൂടെയുള്ള അന്വേഷണം പലപ്പോഴും അന്നുവരെയുള്ള പല ശാസ്ത്രസത്യങ്ങളും തെറ്റാണെന്ന് കണ്ടെത്തുകയും ചെയ്തിട്ടുണ്ട്. ശാസ്ത്രത്തിലെ പഴുതുകളും പഴുതുകളിലൂടെയുള്ള അന്വേഷണവുമാണ് പുതിയ അറിവുകളിലേക്ക് വെളിച്ചം വീശുന്നത്.
ഗ്രഹങ്ങളെക്കുറിച്ചുള്ള നമ്മുടെ അപഗ്രഥനത്തിലെ ഒരു വിടവില് ഗവേഷണം നടത്തിയ കുറച്ച് ഗവേഷകര് അവരുടെ പഠനത്തിലൂടെ പുതിയൊരു കണ്ടെത്തല് നടത്തിയിരിക്കുകയാണ്. ചൊവ്വയ്ക്കും വ്യാഴത്തിനും ഇടയില് സ്ഥിതി ചെയ്യുന്ന ഒരു സൂപ്പര് എര്ത്ത് (നിലവില് അത് സാങ്കല്പ്പികം മാത്രമാണ്) നമ്മുടെ ഭൂമിയെ സൗരയൂഥത്തില് നിന്നും തള്ളിമാറ്റുമെന്നും അതോടെ ഭൂമിയില് ജീവന് ഇല്ലാതാകുമെന്നുമാണ് അവര് കണ്ടെത്തിയിരിക്കുന്നത്. ഭൂമിയേക്കാള് വളരെയധികം വലുപ്പമുള്ള എന്നാല് നെപ്ട്യൂണ്, യുറാനേസ് എന്നിവയേക്കാള് ചെറുതായ ഗ്രഹങ്ങളെയാണ് സൂപ്പര് എര്ത്തുകള് എന്ന് വിളിക്കുന്നത്.
നക്ഷത്രങ്ങളെ കേന്ദ്രീകരിച്ചുള്ള മറ്റ് മിക്ക സൗരയൂഥ സമാന സംവിധാനങ്ങളിലും ഭൂമിക്കും ഭീമന് വാതക ഗ്രഹങ്ങള്ക്കും ഇടയില് വലുപ്പമുള്ള സൂപ്പര് എര്ത്തുകളെ കണ്ടെത്തിയിട്ടുണ്ട് എന്നതാണ് സൗരയൂഥത്തിലും ഒരു സൂപ്പര് എര്ത്ത് ഉണ്ടാകുമോ എന്ന ശാസ്ത്രജ്ഞരുടെ സംഭ്രമത്തിന് കാരണം. അത്തരമൊരു ഗ്രഹത്തെ ഇതുവരെ സൗരയൂഥത്തില് കണ്ടെത്തിയിട്ടില്ല. എങ്കിലും, ചൊവ്വയ്ക്കും വ്യാഴത്തിനുമിടയില് ഇത്തരത്തിലൊരു ഗ്രഹം ഉണ്ടാകാമെന്നത് ദീര്ഘകാലമായി ശാസ്ത്രജ്ഞര് പറയുന്ന കാര്യമാണ്. ഈ ഗ്രഹങ്ങള്ക്കിടയിലെ ദശലക്ഷം കിലോമീറ്റര് ദൂരത്തില് നിലവില് ഒന്നും കണ്ടെത്തിയിട്ടില്ല.
സൗരയൂഥത്തിന്റെ രൂപകല്പ്പനയെക്കുറിച്ചും ഭൂമിയുടെ പരിണാമത്തെ കുറിച്ചും വളരെ പ്രധാനപ്പെട്ട ഉള്ക്കാഴ്ചകള് നല്കാന് ഗ്രഹങ്ങള്ക്കിടയിലെ ഈ വിടവ് സഹായകമാകുമെന്ന് യുസിആര് (യൂണിവേഴ്സിറ്റി ഓഫ് കാലിഫോര്ണിയ, റിവര്സൈഡ്) അസ്ട്രോഫിസിസ്റ്റായ സ്റ്റീഫന് കെയിന് പറയുന്നു. ചൊവ്വയ്ക്കും വ്യാഴത്തിനുമിടയില് എന്തോ ഒന്ന് ഉണ്ടായിരുന്നിരിക്കാം എന്ന തോന്നല് ഗ്രഹങ്ങളെ കുറിച്ച് പഠിക്കുന്ന ശാസ്ത്രജ്ഞര്ക്ക് പലപ്പോഴും ഉണ്ടായിട്ടുണ്ടെന്നും അദ്ദേഹം പറയുന്നു.
ഈ ഒരു തോന്നലിന്റെ അടിസ്ഥാനത്തില് ചൊവ്വയ്ക്കും വ്യാഴത്തിനുമിടയില് പല വലുപ്പത്തിലുള്ള ഗ്രഹസമാന വസ്തുക്കള് ഉണ്ടായാലുള്ള അവസ്ഥയും മറ്റ് ഗ്രഹങ്ങളുടെ ഭ്രമണപഥത്തില് അതുണ്ടാക്കുന്ന മാറ്റവും ഗവേഷകര് കംപ്യൂട്ടര് മാതൃകയിലൂടെ കണ്ടെത്തിയിരുന്നു. എന്തായാലും അവിടെ ഭൂമിയേക്കാള് വലിയ സൂപ്പര് എര്ത്ത് ഉണ്ടായിരുന്നെങ്കില് അത് ഭൂമിക്ക് മാത്രമല്ല, സൗരയൂഥത്തിന് തന്നെ ഭീഷണിയാകുമെന്ന നിഗമനത്തിലാണ് ശാസ്ത്രജ്ഞര് എത്തിയത്.
ഈ സാങ്കല്പ്പിക ഗ്രഹം വ്യാഴത്തെ അതിന്റെ ഭ്രമണപഥത്തില് നിന്നും തള്ളിമാറ്റുകയും സൗരയൂഥത്തിന്റെ സ്ഥിരത തന്നെ തകര്ക്കുകയും ചെയ്യുമായിരുന്നുവെന്ന് പ്ലാനറ്ററി സയന്സ് ജേണലില് പ്രസിദ്ധീകരിച്ച ഇവരുടെ പഠനം പറയുന്നു. ഇത്തരമൊരു ഗ്രഹമുണ്ടായിരുന്നിരിക്കാമെന്ന് ശാസ്ത്രസമൂഹം പ്രതീക്ഷ പുലര്ത്തുന്നുണ്ടെങ്കിലും അതില്ലാത്തത് തന്നെയാണ് സൗരയൂഥത്തിനും ഭൂമിയുടെ നിലനില്പ്പിനും നല്ലതെന്ന് കെയിന് വ്യക്തമാക്കുന്നു.
Discussion about this post