പ്രായപൂർത്തി ആകുന്നതിന് മുൻപ് ഭാര്യ ഗർഭിണിയായി; ശിശു വികസന പദ്ധതി ഓഫീസറുടെ റിപ്പോർട്ടിനെ തുടർന്ന് മലപ്പുറത്ത് ഭർത്താവ് അറസ്റ്റിൽ

മലപ്പുറം: പ്രായപൂർത്തി ആകുന്നതിന് മുൻപ് ഭാര്യ ഗർഭിണിയാതോടെ മലപ്പുറത്ത് യുവാവ് അറസ്റ്റിലായി. പെരിന്തൽമണ്ണ പച്ചീരി സ്വദേശിയായ യുവാവിനെയാണ് പോലീസ് അറസ്റ്റ് ചെയ്തത്.

പ്ലസ് വൺ വിദ്യാർത്ഥിയായിരിക്കെ പരിചയപ്പെട്ട പെൺകുട്ടിയുമായി യുവാവ് പ്രണയത്തിലായിരുന്നു. 2022 ഒക്ടോബർ മാസത്തിൽ, പതിനേഴ് വയസുകാരിയായ പെൺകുട്ടിയെ ഇയാൾ വിളിച്ചിറക്കി കൊണ്ട് വരികയായിരുന്നു.

പെൺകുട്ടിക്ക് ഔദ്യോഗികമായി പ്രായപൂർത്തി ആയതോടെ, 2023 ഫെബ്രുവരി 8ന് ഇരുവരും വിവാഹിതരായി. എന്നാൽ ഈ സമയം പെൺകുട്ടി അഞ്ച് മാസം ഗർഭിണി ആയിരുന്നുവെന്ന് പെരിന്തൽമണ്ണ ശിശു വികസന പദ്ധതി ഓഫീസർ പോലീസിൽ റിപ്പോർട്ട് നൽകുകയായിരുന്നു. ഇതോടെയാണ് യുവാവ് അറസ്റ്റിലായത്.

കേസിൽ സ്റ്റേഷനിൽ സ്വമേധയാ ഹാജരായ യുവാവിനെ പോലീസ് അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ യുവാവിനെ ഈ മാസം 21 വരെ റിമാൻഡ് ചെയ്തു.