അന്താരാഷ്ട്ര ഉറക്കദിനത്തോട് അനുബന്ധിച്ച് മാര്ച്ച് 17ന് അവധി പ്രഖ്യാപിച്ച് ബെംഗളൂരു ആസ്ഥാനമായ കമ്പനി. ജീവനക്കാര്ക്കിടയില് നല്ല ആരോഗ്യശീലങ്ങള് പ്രോത്സാഹിപ്പിക്കുകയെന്ന ലക്ഷ്യത്തോടെയാണ് വെയ്ക്ക്ഫിറ്റ് സൊലൂഷന്സ് എന്ന ഹോം ആന്ഡ് സ്ലീപ് സൊലൂഷന്സ് കമ്പനി ആവശ്യമുള്ളവര്ക്ക് ഉറക്കദിനത്തില് അവധിയെടുക്കാം എന്ന പ്രഖ്യാപനം നടത്തിയത്.
‘സര്പ്രൈസ് ഹോളിഡേ: ഉറക്കം സമ്മാനമായി പ്രഖ്യാപിക്കുന്നു’, എന്ന തലക്കെട്ടോടെ ഇ-മെയില് അയച്ചാണ് കമ്പനി ജീവനക്കാര്ക്ക് ഉറങ്ങാനായി അവധി അനുവദിച്ചത്. വ്യത്യസ്തമായ ഈ അവധിപ്രഖ്യാപനത്തിന്റെ വാര്ത്ത വളരെ പെട്ടെന്ന് വാര്ത്തയായി. ലോക ഉറക്കദിനാചരണത്തോട് അനുബന്ധിച്ച് വെയ്ക്ക്ഫിറ്റ് ജീവനക്കാര്ക്ക് മാര്ച്ച് 17, 2023ന് ഒരു ദിവസത്തെ വിശ്രമം അനുവദിച്ചിരിക്കുന്നു എന്ന തലക്കെട്ടില് പല സോഷ്യല്മീഡിയകളിലും കമ്പനി ജീവനക്കാര്ക്ക് അയച്ച ഇ-മെയിലിന്റെ ദൃശ്യങ്ങള് വൈറലായിക്കൊണ്ടിരിക്കുകയാണ്.
2022 മുതല്ക്ക് ജോലിസമയത്ത് ഉറക്കം തൂങ്ങുന്നവരുടെ എണ്ണത്തില് 21 ശതമാനവും രാവിലെ ക്ഷീണിതരായി എഴുന്നേല്ക്കുന്നവരുടെ എണ്ണത്തില് 11 ശതമാനവും വര്ധനയുണ്ടായതായി ജീവനക്കാര്ക്കുള്ള ഇ-മെയിലില് കമ്പനി പറയുന്നു. ഉറക്കം ഇല്ലാത്ത അവസ്ഥ വര്ധിച്ചുവരുമ്പോള് ഉറക്കം സമ്മാനമായി നല്കി ഉറക്കദിനം ആഘോഷിക്കുന്നതിലും മികച്ച കാര്യമെന്താണെന്ന് കമ്പനി ചോദിക്കുന്നു.
Official Announcement 📢 #sleep #powernap #afternoonnap pic.twitter.com/9rOiyL3B3S
— Wakefit Solutions (@WakefitCo) May 5, 2022
ഇതാദ്യമായല്ല ഈ കമ്പനി ജീവനക്കാര്ക്കായി അസാധാരണ പ്രഖ്യാപനങ്ങള് നടത്തുന്നത്. കഴിഞ്ഞ വര്ഷം കമ്പനി ജീവനക്കാര്ക്കായി റൈറ്റ് ടു നാപ് പോളിസി അവതരിപ്പിച്ചിരുന്നു. ജോലി സമയത്ത് ജീവനക്കാര്ക്ക് 30 മിനിട്ട് ഉച്ചമയക്കം അനുവദിക്കുന്നതായിരുന്നു ഈ നയം.
Discussion about this post