അഫ്ഗാനിസ്ഥാനെതിരായ ട്വന്റി-20 പരമ്പര തൂത്തുവാരിയതിന് ശേഷം മാതൃകാപരമായ മാന്യത കൈവിടാതെ ഇന്ത്യൻ ക്യാപ്റ്റൻ ശ്രേയസ് അയ്യർ. ഡൽഹിയിൽ നടന്ന അവസാന മത്സരത്തിൽ 127 റൺസിന്റെ തകർപ്പൻ വിജയം നേടി ഇന്ത്യ പരമ്പര 3-0ത്തിന് സ്വന്തമാക്കിയെങ്കിലും, മത്സരത്തിന് ശേഷമുള്ള വിജയഘോടനം ഇരു ടീമുകളുടെയും സൗഹൃദത്തിന്റെ മനോഹരമായ കാഴ്ചയായി മാറി. പോസ്റ്റ് മാച്ച് പ്രസന്റേഷന് ശേഷം ഫ്രണ്ട്ഷിപ്പ് കപ്പ് ഏറ്റുവാങ്ങിയ ഇന്ത്യൻ ക്യാപ്റ്റൻ ശ്രേയസ് അയ്യർ, ട്രോഫി ഏറ്റെടുക്കാനും ആഘോഷങ്ങളിൽ പങ്കുചേരാനും അഫ്ഗാൻ നായകൻ ഇബ്രാഹിം സദ്രാനെ വേദിയിലേക്ക് സ്നേഹപൂർവ്വം ക്ഷണിക്കുകയായിരുന്നു.
ട്രോഫിയുമായി ചാമ്പ്യൻസ് ബോർഡിന് സമീപത്തേക്ക് എത്തിയ ഇരു ക്യാപ്റ്റൻമാരും ഒന്നിച്ച് നിന്നതിന് ശേഷം, ഇന്ത്യൻ ടീമിനൊപ്പം വിജയ ചിത്രമെടുക്കുന്നതിനായി അഫ്ഗാൻ നായകനെയും ഒപ്പം കൂട്ടി. പരമ്പരയുടെ പേരിനോട് നീതി പുലർത്തുന്നതായിരുന്നു ശ്രേയസ് അയ്യരുടെ ഈ നടപടി. മത്സരത്തിൽ ആദ്യം ബാറ്റ് ചെയ്ത ഇന്ത്യ അഭിഷേക് ശർമ്മയുടെ തകർപ്പൻ സെഞ്ചുറിയുടെയും (34 പന്തിൽ 108) സഞ്ജു സാംസണിന്റെ അർദ്ധസെഞ്ചുറിയുടെയും (35 പന്തിൽ 50) കരുത്തിൽ 20 ഓവറിൽ 7 വിക്കറ്റ് നഷ്ടത്തിൽ 221 റൺസ് നേടിയിരുന്നു. മറുപടി ബാറ്റിംഗിനിറങ്ങിയ അഫ്ഗാനിസ്ഥാൻ 14.1 ഓവറിൽ 94 റൺസിന് പുറത്താവുകയായിരുന്നു. സമാനമായ ഒരു മാതൃകാപരമായ കാഴ്ച ക്രിക്കറ്റ് ലോകം ഇതിനുമുമ്പും കണ്ടിട്ടുണ്ട്.
2018-ൽ ഇന്ത്യക്കെതിരായ അവരുടെ ആദ്യ ടെസ്റ്റ് മത്സരത്തിൽ അഫ്ഗാനിസ്ഥാൻ പരാജയപ്പെട്ടിരുന്നുവെങ്കിലും, അന്നത്തെ ഇന്ത്യൻ നായകൻ അജിങ്ക്യ രഹാനെ അഫ്ഗാൻ ക്യാപ്റ്റൻ അസ്ഗർ സ്റ്റാനിക്സായിയെയും ടീമിനെയും ഇന്ത്യൻ വിജയ ചിത്രത്തിൽ ഒപ്പം ചേർത്തിരുന്നു. വർഷങ്ങൾക്ക് ശേഷം ശ്രേയസ് അയ്യർ ആ മനോഹരമായ മാതൃക ആവർത്തിച്ചപ്പോൾ ക്രിക്കറ്റ് ലോകത്തിന്റെ മുഴുവൻ അഭിനന്ദനങ്ങളും ഏറ്റെടുക്കുകയാണ് ഇന്ത്യൻ ക്യാപ്റ്റൻ.
