സിനിമ ഇറങ്ങുന്നതിന് മുമ്പുതന്നെ നമ്മള് ഇന്ത്യക്കാര് ഏറ്റെടുത്ത പാട്ടാണ് ആര്ആര്ആറിലെ നാട്ടുനാട്ടു. ജൂനിയര് എന്ടിആറും രാംചരണും തകര്ത്താടിയ ആ പാട്ടിലെ നൃത്തരംഗങ്ങള് സോഷ്യല് മീഡിയയില് നിറഞ്ഞുനിന്നിരുന്നൊരു സമയമുണ്ടായിരുന്നു ഇന്ത്യയില്. എവിടെ നോക്കിയാലും നാട്ടുനാട്ടു റീലുകള്. തെല്ലൊരിടവേളയ്ക്ക് ശേഷം ഗോള്ഡന് ഗ്ലോബും തൊട്ടുപിന്നാലെ ഓസ്കാറും നാട്ടുനാട്ടുവിനെ തേടിയെത്തിയതോടെ സംഗതി ഭൂലോക ഹിറ്റായി. എന്തിനേറെ, നാട്ടുനാട്ടു ലൈവ് പെര്ഫോമന്സ് ഓസ്കാര് വേദിയെ വരെ ഇളക്കിമറിച്ചു. ഓസ്കാര് കിട്ടിയതോടെ നാട്ടുനാട്ടുവില് ഒരു കൈ പരീക്ഷിക്കാന് സെലിബ്രിറ്റികളും എത്തി. വിരാട് കോഹ്ലി മുതല് ഇന്ത്യയിലെ ജര്മ്മന് അംബാസഡര് ഡോ.ഫിലിപ്പ് അക്കര്മാന് വരെ നാട്ടുനാട്ടു ഗാനരംഗത്തിന് ചുവടുവെച്ചു.
ഇപ്പോള് ലോകത്തിന്റെ ഏത് മുക്കിലും മൂലയിലുമുള്ള ഡാന്സ് പ്രേമികളും നാട്ടുനാട്ടു നൃത്തം ചെയ്ത് വൈറലാകാനുള്ള തിരക്കിലാണ്. അത്തരത്തിലൊരു നാട്ടുനാട്ടു ആരാധകവേര്ഷന് രണ്ടുദിവസമായി ഇന്സ്റ്റഗ്രാമില് കറങ്ങിനടക്കുകയാണ്. അമേരിക്കക്കാരിയായ ഒല്ഗ മനസ്യന് ആണ് തന്റെ ചടുലമായ നൃത്തച്ചുവടുകളിലൂടെ നാട്ടുനാട്ടു ട്രാക്ക് അവതരിപ്പിച്ചിരിക്കുന്നത്.
View this post on Instagram
മഴ നനഞ്ഞ് കിടക്കുന്ന ബാസ്കറ്റ്ബോള് കോര്ട്ടിലാണ് ഒല്ഗ നൃത്തം ചവിട്ടുന്നത്. ഈ വര്ഷത്തെ ഓസ്കാറിലെ ഈ പാട്ടും നൃത്തവും മറക്കാനാകാത്തത് ആയിരുന്നുവെന്നും ഈ ഡാന്സ് പഠിക്കാതിരിക്കാന് കഴിഞ്ഞില്ലെന്നും പറഞ്ഞുകൊണ്ടാണ് ഒല്ഗ ഇന്സ്റ്റഗ്രാമില് ഡാന്സ് വീഡിയോ പോസ്റ്റ് ചെയ്തിരിക്കുന്നത്. ഇതിനോടകം തന്നെ ഒല്ഗയുടെ നാട്ടുനാട്ടു ഡാന്സ് ദശലക്ഷക്കണക്കിന് ആളുകള് കണ്ടുകഴിഞ്ഞു. നിരവധി പേര് കമന്റുകളിലൂടെ ഒല്ഗയെ അഭിനന്ദിക്കാനെത്തി. കമന്റുകളില് നാട്ടുനാട്ടുവില് അഭിമാനം കൊള്ളുന്ന ഇന്ത്യക്കാരും ഉണ്ട്. നാട്ടുനാട്ടുവിന്റെ സിനിമ പുറത്തിറങ്ങിയ തെലങ്കാനയില് നിന്നുള്ള ആളാണ് താനെന്നും ഞങ്ങളുടെ വിജയം നിങ്ങളും ഏറ്റെടുത്ത് ആസ്വദിക്കുന്നത് കാണുന്നതില് വളരെ സന്തോഷമുണ്ടെന്നും ഒരു തെലങ്കാന സ്വദേശി കമന്റ് ചെയ്തിരിക്കുന്നു.
അക്കാദമി അവാര്ഡ് പ്രഖ്യാപനത്തിന് മുമ്പ് കൊറിയന് അംബാസഡര് ചാംഗ് ജേ ബൊകും സംഘവും നാട്ടുനാട്ടുവിന് ചുവടുവെച്ചിരുന്നു. ഇതിന്റെ വീഡിയോ ഇന്ത്യയിലെ കൊറിയന് എംബസി തങ്ങളുടെ ട്വിറ്ററില് പങ്കുവെക്കുകയും ചെയ്തു. ഒറിജിനല് പാട്ടില് രാംചരണും ജൂനിയര് എന്ടിആറും ധരിച്ചിരുന്ന വസ്ത്രത്തിന് സമാനമായ വസ്ത്രമാണ് ഇവരും ധരിച്ചിരുന്നത്.
Discussion about this post