എട്ടടി മൂന്നിഞ്ച് നീളമുള്ള താടി ! തന്നേക്കാള് നീളമുള്ള താടി മടിയില് മടക്കി വെച്ച് തലോടിക്കൊണ്ടിരിക്കുന്ന സര്വണ് സിംഗ് കഴിഞ്ഞിടെ തന്റെ റെക്കോഡ് ഒന്ന് പുതുക്കി. ലോകത്തിലെ ഏറ്റവും നീളം കൂടിയ താടിയുള്ള വ്യക്തിയെന്ന സ്വന്തം റെക്കോഡാണ് കാനഡയില് സ്ഥിരതാമസക്കാരനായ സര്വണ് സിംഗ് തിരുത്തിയെഴുതിയത്.
ഗിന്നസ് ലോക റെക്കോഡ് പ്രകാരം 2008ല് താടി 2.33 മീറ്റര് (ഏഴ് അടി എട്ടിഞ്ച്) ആയപ്പോഴാണ് സര്വണ് സിംഗ് ആദ്യമായി താടി റെക്കോഡ് നേടുന്നത്. അന്ന് സ്വീഡിഷുകാരനായ ബിര്ഗര് പെല്ലസിന്റെ 1.77 മീറ്റര് (അഞ്ച് അടി ഒമ്പത് ഇഞ്ച്) താടിയുടെ റെക്കോഡാണ് സര്വണ് സിംഗ് തകര്ത്തത്. 2010ല് ഇറ്റലിയിലെ റോമില് നടന്ന ലൊ ഷോയില് സര്വണ് സിംഗ് പഴയ റെക്കോഡ് തിരുത്തി. അന്ന് അദ്ദേഹത്തിന്റെ താടി 2.495 മീറ്റര് (എട്ട് അടി, 2.5 ഇഞ്ച്) ആയിരുന്നു. പക്ഷേ കഴിഞ്ഞ വര്ഷം ഒക്ടോബറില് അളന്നപ്പോള് താടി വീണ്ടും നീണ്ടിരുന്നു. നരച്ച മുടികളുടെ എണ്ണം കൂടിയെങ്കിലും താടി സൗന്ദര്യത്തിന് ഒട്ടും ഉലച്ചില് സംഭവിച്ചിട്ടില്ലെന്നാണ് കാണുന്നവര് പറയുന്നത്.
സിഖ് മതം പിന്തുടരുന്ന സര്വണ് ഒരിക്കലും തന്റെ താടി വെട്ടിയിട്ടില്ല. പതിനേഴാം വയസ്സിലാണ് താന് താടി വളര്ത്തല് ആരംഭിച്ചതെന്നും താടി വളര്ന്നങ്ങ് പോയപ്പോള് അതിനെ അതിന്റെ വഴിക്ക് വിടാന് തീരുമാനിക്കുകയായിരുന്നുവെന്നും അദ്ദേഹം പറയുന്നു. ഓരോ ദിവസവും താടി പരിചരണത്തിന് നല്ല സമയം തന്നെ ഇദ്ദേഹം മാറ്റിവെക്കും. ഓരോ താടിരോമത്തിനും ശ്രദ്ധ കിട്ടുന്ന രീതിയിലുള്ള പരിചരണമാണ് നല്കുന്നത്. ഈ താടി ദൈവത്തിന്റെ സമ്മാനമായാണ് അദ്ദേഹം കരുതുന്നത്. സിഖുകാരെ സംബന്ധിച്ചെടുത്തോളം ഇത് വളരെ പ്രധാനപ്പെട്ട ഒന്നാണെന്നും അദ്ദേഹം പറയുന്നു.
റെക്കോഡിനായി താടിയുടെ നീളം അളക്കുമ്പോള് അത് സ്വഭാവികമായ അവസ്ഥയിലായിരിക്കണമെന്നും നനഞ്ഞിരിക്കണമെന്നുമാണ് ഗിന്നസ് ബുക്ക് പറയുന്നത്. മുടിയിലെ ചുരുളുകള് കാരണം നീളത്തില് വ്യത്യാസം ഉണ്ടാകാതിരിക്കാനാണ് ഇത്.
Discussion about this post