ചില ബന്ധങ്ങൾ ആളുകളുടെ ഹൃദയം തകർത്തുകൊണ്ടാണ് പര്യവസാനിക്കുന്നത്. ‘ഹൃദയം തകർത്ത’ ബന്ധം എന്ന് പലപ്പോഴും ആലങ്കാരികമായി പറയാറുണ്ടെങ്കിലും, ഹൃദയം തകർക്കുകയെന്ന പ്രയോഗം ഏറെക്കുറേ അതിന്റെ അർത്ഥത്തോട് നീതി പുലർത്തുന്ന ഒന്നുതന്നെയാണ്. അത്തരം അവസ്ഥകളിലൂടെ കടന്നുപോകുന്നവർ അനുഭവിക്കുന്ന വേദന മാനസികം മാത്രമല്ല. അതിനെ ശാരീരികമായും വിശദീകരിക്കാൻ കഴിയും.
ആരോടെങ്കിലും പ്രണയം തോന്നുമ്പോൾ ഒരു വ്യക്തിയുടെ ശരീരത്തിലേക്ക് നിരവധി ഹോർമോണുകൾ പ്രവഹിക്കും. സ്നേഹത്തിന്റെ ഹോർമോണെന്ന് അറിയപ്പെടുന്ന ഓക്സിടോസിനും സുഖം തോന്നിപ്പിക്കുന്ന ഹോർമോണായ ഡോപ്പമൈനും ചേർന്ന് ശരീരത്തിൽ ചില മാജിക്കുകൾ കാണിക്കുന്നതോടെ പ്രണയിക്കുന്നവർ ഉന്മാദത്തിന്റെയും ആനന്ദത്തിന്റെയും ലോകത്തിലേക്ക് ചേക്കേറുന്നു. പക്ഷേ ഒരു പ്രണയബന്ധം തകരുമ്പോൾ, അല്ലെങ്കിൽ ഹൃദയം തകരുമ്പോൾ ഉണ്ടാകുന്ന നെഗറ്റീവ് വികാരങ്ങൾ എല്ലാ സന്തോഷവും ഇല്ലാതാക്കുന്നു. സ്ട്രെസ്സ് ഹോർമോൺ ആയ കോർട്ടിസോൾ, അഡ്രിനാലിൻ, നോർഅഡ്രിനാലിൻ എന്നീ ഹോർമോണുകളാണ് ഇവിടെ വില്ലന്മാരായി എത്തുന്നത്. ഇവയുടെ പ്രവർത്തനം മൂലം പ്രണയിക്കുമ്പോൾ ഉണ്ടായിരുന്നതിന് നേർ വിപരീതമായ അവസ്ഥയിലേക്ക് ആളുകളുടെ മനസും ശരീരവും എത്തുന്നു.
തീവ്രമായ വൈകാരിക, ശാരീരിക സ്ട്രെസ്സ് മൂലം പ്രണയത്തകർച്ചയുണ്ടായ വ്യക്തിക്ക് നെഞ്ചിനുള്ളിൽ നേരിയ വേദന അനുഭവപ്പെടുന്ന ഈ അവസ്ഥ വൈദ്യശാസ്ത്ര ലോകത്ത് തകോട്സുബോ കാർഡിയോമയോപതി അല്ലെങ്കിൽ ബ്രോക്കൺ ഹാർട്ട് സിൻഡ്രം എന്നാണ് അറിയപ്പെടുന്നത്. നെഞ്ചുവേദന തുടരുകയാണെങ്കിൽ അപൂർവ്വമായി, ബ്രോക്കൺ ഹാർട്ട് സിൻഡ്രം ചികിത്സ വേണ്ടുന്ന ഒരു അവസ്ഥയായി മാറാറുണ്ട്. പ്രണയത്തകർച്ച കൊണ്ട് മാത്രമല്ല, കടുത്ത മാനസിക പിരിമുറുക്കം അനുഭവപ്പെടുന്നതോ തീവ്രമായ മറ്റ് അവസ്ഥകളിലോ ബ്രോക്കൺ ഹാർട്ട് സിൻഡ്രം ഉണ്ടാകാറുണ്ട്. ഹൃദയത്തിൽ നിന്നുള്ള രക്തത്തിന്റെ ഒഴുക്കിൽ വ്യത്യാസം ഉണ്ടാക്കുന്ന താത്കാലികമായ ഒരു അവസ്ഥയാണിത്. ചില ഘട്ടങ്ങളിൽ ഹൃദയം ശക്തിയായി രക്തം പമ്പ് ചെയ്യുന്നത് കൊണ്ടാണ് നെഞ്ചിനുള്ളിൽ വേദന തോന്നുന്നത്.
പ്രിയപ്പെട്ടവരെ നഷ്ടമാകൽ, ഗുരുതരമായ അപകടങ്ങൾ, വൈകാരികമായ സ്ട്രെസ്സ് , ഭൂമികുലുക്കം പോലുള്ള പ്രകൃതിക്ഷോഭങ്ങൾ തുടങ്ങിയ സാഹചര്യങ്ങളിൽ ഹൃദയത്തിൽ നിന്ന് രക്തം പമ്പ് ചെയ്യുന്ന പ്രധാന അറയായ ഇടത് വശത്തെ വെൻട്രിക്കിൾ ദുർബലമാകുന്നത് കൊണ്ടാണ് ബ്രോക്കൺ ഹാർട്ട് സിൻഡ്രം ഉണ്ടാകുന്നതെന്ന് ഹാർവാർഡ് മെഡിക്കൽ സ്കൂൾ (എച്ച്എംഎസ്) പറയുന്നു. ബ്രോക്കൺ ഹാർട്ട് സിൻഡ്രത്തിന്റെ ലക്ഷണങ്ങൾ ഹൃദയാഘാതത്തിന്റെ ആദ്യ ലക്ഷണങ്ങൾക്ക് സമാനമാണ്. കാരണം ശ്വാസമെടുക്കുന്നതിലെ ബുദ്ധിമുട്ടും നെഞ്ചുവേദനയും ഈ രണ്ട് അവസ്ഥകളിലും ഉണ്ടാകാറുണ്ട്. ബ്രോക്കൺ ഹാർട്ട് സിൻഡ്രം താത്കാലികമായ ഒരു അവസ്ഥയാണ് എന്നതിനാൽ അതിന് പ്രത്യേകിച്ച് ചികിത്സാരീതികളൊന്നും ഇല്ല. സാധാരണയായി എന്തെങ്കിലും വേദനാസംഹിരാകൾ മാത്രമേ ഇതിനാവശ്യമായി വരാറുള്ളുവെന്ന് എച്ച്എംഎസ് പറയുന്നു.
