ഇന്ന് ലോക ബൈപ്പോളാർ ദിനമാണ്. അടിക്കടി മൂഡിലുണ്ടാകുന്ന ഉയർച്ച താഴ്ചകൾ ആണ് ബൈപ്പോളാർ രോഗത്തെ ദുഷ്കരമാക്കുന്നത്. പലതരത്തിലാണ് തലച്ചോറിലുണ്ടാകുന്ന ഈ തകരാറ് ഒരു വ്യക്തിയുടെ മൂഡിനെ ബാധിക്കുക. അതുകൊണ്ടുതന്നെ ഈ അവസ്ഥ അനുഭവിക്കുന്നവർ കടുത്ത മൂഡ് വ്യതിയാനങ്ങൾക്ക് ഇരയാകുന്നു. ഡിപ്രെഷൻ, മാനിയ ആണ് ബൈപ്പോളാർ രോഗത്തിന്റെ സാധാരണയായി കണ്ടുവരുന്ന രണ്ട് പ്രധാന ഘട്ടങ്ങൾ. ഇവ ഒന്നിനുപിറകേ ഒന്നായി തുടരെത്തുടരെ വന്നുകൊണ്ടിരിക്കും. ഡിപ്രെഷൻ ഘട്ടത്തിൽ ഒരു വ്യക്തിക്ക് വളരെ മോശം മൂഡ്, ഉന്മേഷക്കുറവ്, അസ്വസ്ഥത എന്നിവ അനുഭവപ്പെടും. എന്നാൽ രണ്ടാംഘട്ടമായ മാനിയയിൽ വ്യക്തി വളരെ സന്തോഷത്തോടെയും ആവേശത്തോടെയും ഊർജ്ജസ്വലതയോടെയും കാണപ്പെടുന്നു. സാധാരണ അവസ്ഥയിൽ എടുക്കാൻ ഇടയില്ലാത്ത പല അപകടം പിടിച്ച തീരുമാനങ്ങളും ബൈപ്പോളാർ രോഗികൾ മാനിയ ഘട്ടത്തിൽ എടുക്കാറുണ്ട്. നേരെമറിച്ച്, ഡിപ്രെഷൻ ഘട്ടത്തിൽ തീരുമാനങ്ങൾ എടുക്കാൻ ഇവർക്ക് വലിയ ബുദ്ധിമുട്ടായിരിക്കും.
മരുന്നുകളുടെയും തെറാപ്പിയുടെയും സഹായത്തോടെ ബൈപ്പോളാർ ഡിസോഡർ ഉള്ളവർക്ക് സാധാരണജീവിതം നയിക്കാനാകും. പക്ഷേ അതോടൊപ്പം തന്നെ ജീവിതശൈലി കൃത്യനിഷ്ഠമാക്കുകയും മൂഡ് വ്യതിയാനത്തെ വിളിച്ചുവരുത്തുന്ന സാഹചര്യങ്ങൾ ഒഴിവാക്കുകയും വേണം. സ്ട്രെസ്സ്, കൃത്യനിഷ്ഠയില്ലാത്ത ഉറക്കക്രമം, മദ്യം, മയക്കുമരുന്ന് എന്നിവയുടെ ഉപയോഗം തുടങ്ങിയവയെല്ലാം ഈ രോഗമുള്ളവരിൽ മൂഡ് സ്വിംഗ്സ് അഥവാ മൂഡ് വ്യതിയാനങ്ങൾക്ക് കാരണമാകും. രാസഅസന്തുലിതാവസ്ഥ, തലച്ചോറിന്റെ ക്രമരഹിതമായ പ്രവർത്തനം എന്നിവ കൊണ്ടാണ് ബൈപ്പോളാർ ഡിസോഡർ ഉണ്ടാകുന്നതെന്ന് കരുതപ്പെടുന്നു.
എല്ലാ വർഷവും മാർച്ച് 30 ലോക ബൈപ്പോളാർ ദിനമായി ആചരിക്കുന്നു. ഈ രോഗത്തെ കുറിച്ചുള്ള ബോധവൽക്കരണമാണ് ദിനാചരണത്തിലൂടെ ലക്ഷ്യമിടുന്നത്.
നല്ല ഉറക്കം, ഭക്ഷണം, വ്യായാമം
ഭക്ഷണം, വ്യായാമം, ഉറക്കം എന്നിവ ഉൾപ്പടെ കൃത്യതയുള്ള ദിനചര്യ ബോപ്പോളാർ രോഗികൾക്ക് രോഗം മൂലമുള്ള ബുദ്ധിമുട്ടുകളെ അകറ്റിനിർത്താൻ ഏറെ ഗുണം ചെയ്യുമെന്ന് മാനസികാരോഗ്യ വിദഗ്ധർ പറയുന്നു. ഉത്കണ്ഠ, സ്ട്രെസ്സ്, ഡിപ്രെഷൻ എന്നിവ കുറയ്ക്കാൻ സഹായിക്കുമെന്നതിനാൽ ബൈപ്പോളാർ രോഗമുള്ളവർ എല്ലാ ദിവസവും വ്യായാമം ചെയ്യണം. മാത്രമല്ല, വ്യായാമത്തിലൂടെ തലച്ചോറിനുള്ളിലെ സുഖം തോന്നിപ്പിക്കുന്ന ന്യൂറോട്രാൻസ്മിറ്ററുകളായ എൻഡോർഫിൻസിന്റെ ഉൽപ്പാദനം വർധിക്കുകയും അത് മൂഡ് മെച്ചപ്പെടുത്തുകയും ചെയ്യുന്നു. രാത്രിയിൽ നല്ല ഉറക്കം ലഭിക്കുന്നത് ഉന്മേഷത്തോടെയും ഊർജ്ജസ്വലതയോടെയും ഇരിക്കാൻ സഹായിക്കും. എന്നാൽ ഉറക്കപ്രശ്നങ്ങൾ മൂഡിനെ സാരമായി ബാധിക്കുകയും ബൈപ്പോളാർ രോഗികളെ കൂടുതൽ അസ്വസ്ഥരും ക്ഷീണിതരും ആക്കുകയും ചെയ്യുന്നു.
Discussion about this post