മാഹി : കേരളത്തിൽ പെട്രോളിനും ഡീസലിനും ലിറ്ററിന് രണ്ട് രൂപ നിരക്കിൽ സാമൂഹ്യസുരക്ഷാ സെസ് ഏർപ്പെടുത്തിയതോടെ, ഇന്ധനം നിറയ്ക്കാൻ ആളുകൾ മാഹിയിലേക്ക് പോകുകയാണ്. കേരളവുമായി താരതമ്യപ്പെടുത്തുമ്പോൾ പെട്രോൾ ലിറ്ററിന് 14 രൂപയും ഡീസലിന് ലിറ്ററിന് 13 രൂപയും മാഹിയിൽ കുറവാണ്. ഈ സാഹചര്യത്തിൽ മാഹിയിലെ പമ്പുകളിൽ വൻ തിരക്കാണ് അനുഭവപ്പെടുന്നത്.
ഇതിനിടെ മാഹിയിൽ ചെന്ന് ഇന്ധനം നിറച്ച് കേരള സർക്കാരിനെ പുകഴ്ത്തുന്ന ഒരാളുടെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. കോടിയേരിയിൽ നിന്ന് മാഹിയിൽ പോയി പെട്രോളടിക്കുന്ന ബൈക്ക് യാത്രക്കാരനാണ് വീഡിയോയിലുള്ളത്. ”കേരളത്തിൽ പെട്രോളിനും ഡീസലിനും രണ്ട് രൂപ കൂടിയത് കൊണ്ട് വലിയ പ്രശ്നമൊന്നും ഇല്ല. അതിന്റെ ഗുണം കേരളക്കാർക്ക് കിട്ടും” എന്നാണ് ഇയാൾ പറഞ്ഞത്. ഒരു പ്രമുഖ മാദ്ധ്യമത്തോട് പ്രതികരിക്കുന്ന വീഡിയോയാണ് ഇത്.
വീഡിയോ വൈറലായതോടെ ട്രോളുകളുമായി നിരവധി പേരാണ് എത്തുന്നത്.
” കേരളത്തില് രണ്ടു രൂപാ കൂടിയാൽ എനിക്ക് എന്താ പ്രശ്നം… മാഹി കേരളത്തിലല്ലല്ലോ..” എന്ന പ്രതികരണങ്ങളാണ് വീഡിയോയ്ക്ക് ലഭിക്കുന്നത്.
”ഹൈടെക്ക് അന്തം കമ്മി” എന്ന് ചിലർ പറയുന്നുണ്ട്.
”കേരളത്തിൽ വില കൂടിയതിന്റെ ഗുണം കേരളക്കാർക്ക് കിട്ടും പക്ഷെ എന്റെ പങ്ക് ഉണ്ടാവില്ല, ഞാൻ മാഹീന്നേ അടിക്കൂ” എന്നും ചില കമന്റുകൾ പ്രത്യക്ഷപ്പെടുന്നുണ്ട്.
ഒരു ലിറ്റർ പെട്രോളിന് മാഹിയിൽ നൽകേണ്ടത് 93 രൂപ 80 പൈസയാണ്. മാഹി പിന്നിട്ട് തലശ്ശേരിയിൽ എത്തിയാൽ വില 108 രൂപ 19 പൈസയാകും. അതായത് 14 രൂപ 39 പൈസയുടെ വ്യത്യാസം. ഡീസലിന് 97 രൂപ 12 പൈസയാണ് കണ്ണൂരിലെ വില. മാഹിയിൽ ഇത് 83 രൂപ 72 പൈസയാണ്. 13 രൂപ 40 പൈസയുടെ വ്യത്യാസം. അതുകൊണ്ട് തന്നെ ഇവിടെയുള്ളവരെല്ലാം മാഹിയിൽ നിന്നാണ് ഇന്ധനം നിറയ്ക്കുന്നത്. അത് കൂടാതെ മാഹിയിൽ നിന്ന് ഇന്ധന കടത്തും വർദ്ധിക്കുന്നുണ്ട്.
Discussion about this post