കൊല്ലം: കൊല്ലം എഴുകോണിൽ യുവാവിനെ കാറിടിച്ച് കൊല്ലാൻ ശ്രമം. ആക്രമണത്തിന്റെ സിസിടിവി ദൃശ്യങ്ങളും പുറത്ത് വന്നിട്ടുണ്ട്. എഴുകോൺ വട്ടമൺകാവിലാണ് സംഭവം. വെള്ളനിറത്തിലുള്ള കാർ മനു എന്ന യുവാവിനെ ഇടിച്ച് വീഴ്ത്തുകയായിരുന്നു.
കാറിന്റെ നമ്പർപ്ലേറ്റ് മറച്ചുവച്ച നിലയിലായിരുന്നു. മനു സഞ്ചരിച്ച ബൈക്ക് കാർ പിന്നിൽ നിന്ന് ഇടിച്ച് വീഴ്ത്തുന്ന ദൃശ്യങ്ങളാണ് പുറത്ത് വന്നത്. വീണ ശേഷം മനു എഴുന്നേറ്റ് നിൽക്കുമ്പോൾ ഈ കാർ വീണ്ടും തിരികെയെത്തി ഇടിക്കാൻ പോകുന്നതായി കാണാം. കഴിഞ്ഞ ദിവസം വൈകിട്ട് ആറ് മണിയോടെയാണ് സംഭവം.
പരിക്കേറ്റ മനു കൊട്ടാരക്കര താലൂക്ക് ആശുപത്രിയിൽ ചികിത്സ തേടി. കാറിൽ ഉണ്ടായിരുന്നവരെ മനു തിരിച്ചറിഞ്ഞതായാണ് വിവരം. പ്രദേശത്തെ ഉത്സവാഘോഷവുമായി ബന്ധപ്പെട്ട് ഇവർ തമ്മിൽ നേരത്തേയും കലഹം ഉണ്ടായിരുന്നു. അതിന്റെ തുടർച്ചയാകാം ഇതെന്നാണ് സംശയിക്കുന്നത്. ക്രിമിനൽ കേസുകളിൽ പ്രതിയാണ് മനു. അതേസമയം ഇയാൾ പോലീസിൽ പരാതി നൽകിയിട്ടില്ല. കേസ് രജിസ്റ്റർ ചെയ്തിട്ടില്ലെങ്കിലും അന്വേഷണം ആരംഭിച്ചതായി പോലീസ് അറിയിച്ചു.
Discussion about this post