കണ്ണൂർ: വന്ദേഭാരത് ട്രെയിൻ ട്രയൽ റണ്ണിൽ ഷൊർണൂർ മുതൽ സഞ്ചരിച്ചത് 110 കിലോമീറ്റർ വേഗത്തിൽ. ട്രെയിൻ നിയന്ത്രിച്ച ലോക്കോ പൈലറ്റുമാരാണ് ഇക്കാര്യം വാർത്താചാനലുകളോട് സംസാരിക്കവേ വെളിപ്പെടുത്തിയത്. വന്ദേഭാരതിന്റെ വേഗം സംബന്ധിച്ച വിവാദങ്ങൾ തുടരുന്നതിനിടെ ആയിരുന്നു ട്രയൽ റൺ.
ഷൊർണൂർ- പാലക്കാട്, ഷൊർണൂർ- മംഗലാപുരം റൂട്ടിൽ സെക്ഷണൽ സ്പീഡ് 110 കിലോമീറ്റർ ആണെന്ന് ട്രയൽ റണ്ണിൽ ലോക്കോ പൈലറ്റ് ആയിരുന്ന എഐ കുര്യാക്കോസ് പറഞ്ഞു. കോഴിക്കോട്, എറണാകുളം, തിരുവനന്തപുരം സെക്ഷനുകളിൽ 80, 90, 100 കിലോമീറ്റർ എന്നിങ്ങനെ വേഗതയുണ്ടാകുമെന്നും അദ്ദേഹം പറഞ്ഞു. ഏഴ് മണിക്കൂറും എട്ട് മിനിറ്റും മാത്രമെടുത്താണ് ട്രെയിൻ ഇന്ന് ട്രയൽ റൺ പൂർത്തിയാക്കിയത്.
വന്ദേഭാരത് ട്രെയിനുകളുടെ ആക്സിലറേഷൻ വളരെ പെട്ടന്ന് ആണ്. ബ്രേക്കിങ് ദൂരം കുറച്ച് മതി. വളരെ പെട്ടന്ന് ആക്സിലറേറ്റ് ചെയ്ത് വേഗം കൈവരിക്കാനാകുമെന്നതിനാൽ താമസം ഒഴിവാകുമെന്നും കുര്യാക്കോസ് പറഞ്ഞു. വന്ദേഭാരത് ട്രെയിൻ റെയിൽവേയുടെ നല്ലൊരു കാൽവെയ്പ് ആണ്. കംപ്യൂട്ടർ നിയന്ത്രണത്തിലായതിനാൽ എന്ത് തകരാർ എവിടെയുണ്ടെങ്കിലും ഡിസ്പ്ലേയിൽ കണ്ടുപിടിക്കാനാകും. മറ്റ് ട്രെയിനുകളെ അപേക്ഷിച്ച് യൂസർ ഫ്രണ്ട്ലിയാണെന്നും നിയന്ത്രിക്കാൻ എളുപ്പമാണെന്നും കുര്യാക്കോസ് പറഞ്ഞു.
പാലക്കാട് ഡിവിഷനിലെ ലോക്കോ പൈലറ്റ് ആണ് കുര്യാക്കോസ്. കണ്ണൂരിൽ വലിയ സ്വീകരണമാണ് ലോക്കോ പൈലറ്റുമാർക്ക് നൽകിയത്. ജനം ഏറ്റെടുത്തത് കൊണ്ടാകും ഇതുപോലെ ഒരു സ്വീകരണമെന്നും തന്റെ സർവ്വീസ് കാലയളവിൽ ഇതുവരെ ഇതുപോലെ സ്വീകരണം ലഭിച്ചിട്ടില്ലെന്നും കുര്യാക്കോസ് പറഞ്ഞു.
Discussion about this post