ആരോഗ്യകരമായ ജീവിതശൈലികൾ സ്വാംശീകരിക്കുക, കരൾ രോഗങ്ങളെ കുറിച്ച് അവബോധം സൃഷ്ടിക്കുക എന്നീ ലക്ഷ്യങ്ങൾ മുൻനിർത്തിയാണ് ഏപ്രിൽ 19 ലോക കരൾ ദിനമായി ആചരിക്കുന്നത്. രോഗപ്രതിരോധം, ദഹനം, ഭക്ഷണ വിഘടനം എന്നീ പ്രക്രിയകളിൽ സുപ്രധാന പങ്കുവഹിക്കുന്ന അവയവമാണ് കരൾ. അതുകൊണ്ട് തന്നെ കരളിന്റെ ആരോഗ്യം അത്രമേൽ പ്രധാനപ്പെട്ടതാണ്.
ഇന്ത്യയിൽ രോഗബാധിതമായ മരണങ്ങളുടെ നിരക്കിൽ പത്താം സ്ഥാനത്താണ് കരൾ രോഗങ്ങൾ നിമിത്തമുള്ള മരണങ്ങൾ എന്നാണ് ലോകാരോഗ്യ സംഘടനയുടെ കണക്ക്. ആരോഗ്യകരമായ ജീവിതശൈലികൾ പിന്തുടരുക, എണ്ണ കൂടുതലുള്ള ഭക്ഷണങ്ങൾ ഒഴിവാക്കുക, കരൾ രോഗങ്ങളെ കുറിച്ച് അവബോധം സൃഷ്ടിക്കുക എന്നിവ നമ്മൾ ഓരോരുത്തരുടെയും കടമയാണ്.
‘ജാഗ്രതയോടെ ഇരിക്കൂ, പതിവായി കരൾ പരിശോധനകൾ നടത്തൂ, കരൾ വീക്കം ആരെയും ബാധിക്കാം‘ എന്നതാണ് ഈ വർഷത്തെ കരൾ ദിനത്തിന്റെ പ്രമേയം.
മനുഷ്യശരീരത്തിലെ ഏറ്റവും സുപ്രധാന അവയവങ്ങളിൽ രണ്ടാം സ്ഥാനമാണ് കരളിന് ഉള്ളത്. ഭക്ഷണ വിഘടനം, രോഗ പ്രതിരോധം, വിസർജ്ജനം, ആഗിരണം ചെയ്ത പോഷക ഘടകങ്ങളുടെ സംഭരണം തുടങ്ങിയ പ്രക്രിയകളിൽ സുപ്രധാനമായ ധർമമാണ് കരളിന് ഉള്ളത്. കരൾ അപകടത്തിലായാൽ, അത് ദഹനവ്യവസ്ഥയുടെയും വൃക്കകളുടെയും ശ്വാസകോശത്തിന്റെയും ഹൃദയത്തിന്റെയും തലച്ചോറിന്റെയും പ്രവർത്തനങ്ങളെ ബാധിക്കുന്നു.
കൊഴുപ്പിന്റെ അമിതമായ അടിഞ്ഞുകൂടലാണ് കരളിന്റെ ആരോഗ്യത്തിന് ഏറ്റവും ഹാനികരമായ അവസ്ഥ. വിശപ്പില്ലായ്മ, വയറുവേദന, മഞ്ഞപ്പിത്തം, ഭാരക്കുറവ് എന്നിവ കരൾ രോഗങ്ങളുടെ ലക്ഷണങ്ങളാണ്.
മോശം ജീവിതശൈലികളാണ് പ്രധാനമായും കരൾ രോഗങ്ങൾക്ക് കാരണമാകുന്നത്. ദീർഘകാലം നീണ്ടുനിൽക്കുന്ന മദ്യത്തിന്റെ ഉപയോഗം, തുടർച്ചയായുള്ള അനാരോഗ്യകരമായ ഭക്ഷണ ശീലങ്ങൾ, നിഷേധാത്മകമായ ജീവിത രീതി, വ്യായാമക്കുറവ് എന്നിവയാണ് കരൾ രോഗങ്ങളുടെ പ്രധാന കാരണങ്ങൾ.
