തിരുവനന്തപുരം; മൂന്നാം വയസിൽ മാതാപിതാക്കൾ തമ്പാനൂരിൽ ട്രെയിനിൽ ഉപേക്ഷിച്ചു. കേൾവിയും സംസാരശേഷിയും ഇല്ല. വളരുന്നത് തിരുവനന്തപുരം ശ്രീചിത്ര പുവർ ഹോമിൽ. വന്ദേഭാരതിന്റെ ഉദ്ഘാടനത്തിന് തിരുവനന്തപുരത്ത് എത്തിയ പ്രധാനമന്ത്രി നരേന്ദ്രമോദി ചേർത്ത് നിർത്തി ആശ്ലേഷിച്ച കലാകാരൻ രാഹുലിന്റെ വിശേഷങ്ങളാണിത്. മോദിക്കൊപ്പമുളള വീഡിയോയും ചിത്രങ്ങളും വൈറൽ ആയതോടെ നിരവധി പേരാണ് രാഹുലിനെ അഭിനന്ദിച്ച് എത്തുന്നത്.
കേരളത്തിന് കേന്ദ്രസർക്കാരിന്റെ സമ്മാനമായി ലഭിച്ച വന്ദേഭാരത് ട്രെയിൻ പ്രധാനമന്ത്രി ഫ്ലാഗ് ഓഫ് ചെയ്യുന്ന ചിത്രമാണ് രാഹുൽ അദ്ദേഹത്തിന് വരച്ച് നൽകിയത്. ചിത്രം കൈയ്യിൽ വാങ്ങി നോക്കിയ പ്രധാനമന്ത്രിയോട് ആംഗ്യഭാഷയിൽ രാഹുൽ സംസാരിക്കാൻ തുടങ്ങി. ഒപ്പമുണ്ടായിരുന്ന ആൾ രാഹുലിന് പറയാനുളളത് പ്രധാനമന്ത്രിക്ക് ട്രാൻസ്ലേറ്റ് ചെയ്തു നൽകി.
ആദ്യമായിട്ടാണ് പ്രധാനമന്ത്രിയെ കാണുന്നതെന്നും അങ്ങേയറ്റം സന്തോഷമുണ്ടെന്നുമാണ് രാഹുൽ പ്രധാനമന്ത്രിയോട് പറഞ്ഞത്. ഇത് കേട്ട മോദി രാഹുലിനെ സ്നേഹത്തോടെ ചേർത്തുനിർത്തി ആശ്ലേഷിക്കുകയായിരുന്നു. നല്ല കലാകാരനായി വളരണമെന്നും തനിക്ക് ഇങ്ങനെയൊന്നും ചിത്രങ്ങൾ വരയ്ക്കാനാകുന്നില്ലല്ലോയെന്നും പ്രധാനമന്ത്രി രാഹുലിനോട് പറഞ്ഞു. ദൃശ്യങ്ങൾ വീഡിയോ ആയി പ്രധാനമന്ത്രിയുടെ സോഷ്യൽ മീഡിയ അക്കൗണ്ടുകളിൽ പോസ്റ്റ് ചെയ്തതോടെ വൈറലാകുകയും ചെയ്തു.
20 വർഷങ്ങൾക്ക് മുൻപാണ് രാഹുലിനെ ശ്രീചിത്ര പുവർ ഹോമിൽ എത്തിക്കുന്നത്. ട്രെയിനിൽ മാതാപിതാക്കൾ ഉപേക്ഷിച്ച നിലയിൽ കണ്ട മൂന്ന് വയസുളള കുട്ടിയെ തമ്പാനൂർ പോലീസാണ് അന്ന് ഇവിടെ എത്തിച്ചത്. പേര് നൽകിയതും ശ്രീചിത്ര പുവർ ഹോമിൽ നിന്നാണ്. ചിത്രം വരയ്ക്കാനുളള രാഹുലിന്റെ കഴിവ് ജൻമസിദ്ധമാണെന്ന് പുവർ ഹോമിലെ സൂപ്രണ്ട് ബിന്ദു പറഞ്ഞു. വരയ്ക്കാനുളള വാസന നേരത്തെ പ്രകടിപ്പിച്ചിരുന്നു. അതനുസരിച്ച് സാധനങ്ങളും വാങ്ങി നൽകി. ജീവൻ തുടിക്കുന്ന ഒട്ടേറെ ചിത്രങ്ങൾ രാഹുൽ ഇതിനോടകം പൂർത്തീകരിച്ചിട്ടുണ്ട്.
റെയിൽവേ മത്സരം നടത്തിയാണ് പ്രധാനമന്ത്രിക്കൊപ്പം സഞ്ചരിക്കാൻ അർഹരായ കുട്ടികളെ തിരഞ്ഞെടുത്തത്. 18 വയസിൽ താഴെയുളളവർക്കായിരുന്നു മത്സരമെങ്കിലും രാഹുലിന്റെ കാര്യം പ്രത്യേക കേസായി സൂപ്രണ്ട് പറഞ്ഞതോടെ റെയിൽവേ ഉദ്യോഗസ്ഥർ അനുമതി നൽകുകയായിരുന്നു. സൂപ്രണ്ട് തന്നെയാണ് ട്രെയിൻ ഫ്ലാഗ് ഓഫ് ചെയ്യുന്ന ചിത്രം വരയ്ക്കാൻ നിർദ്ദേശിച്ചത്.
ജഗതിയിലെ സ്പെഷൽ സ്കൂളിൽ പ്ലസ് ടു കഴിഞ്ഞ രാഹുലിനെ ഫൈൻ ആർട്സ് കോളജിൽ വിട്ട് പഠിപ്പിക്കണമെന്നാണ് ആഗ്രഹമെന്ന് സൂപ്രണ്ട് പറഞ്ഞു. ഇതിനായി ജില്ലാ കളക്ടർ ഉൾപ്പെടെയുളളവരുടെ പിന്തുണ തേടുമെന്നും അവർ പറഞ്ഞു. പ്രധാനമന്ത്രിയെ കണ്ടതോടെ രാഹുലിനും ഇരട്ടി ആവേശവും ഊർജ്ജവുമായെന്ന് ശ്രീചിത്ര പുവർ ഹോമിലെ ജീവനക്കാർ പറയുന്നു.
