തിരുവനന്തപുരം: കൊച്ചി കേന്ദ്രീകരിച്ച് നടന്ന ഓണ്‍ലൈന്‍ പെണ്‍വാണിഭസംഘത്തിന്റെ സൂത്രധാരന്‍ എറണാകുളം സ്വദേശി ജോഷി എന്ന അച്ചായനുവേണ്ടി പോലീസ് തിരച്ചില്‍ ശക്തമാക്കി. കഴിഞ്ഞദിവസം പിടിയിലായ കാസര്‍കോട് സ്വദേശി അബ്ദുള്‍ഖാദറില്‍നിന്നാണ് ഇയാളെ സംബന്ധിച്ച വിവരം ലഭിച്ചത്.
പോലീസ് സംഘത്തെ വെട്ടിച്ച് രക്ഷപ്പെട്ട കാറില്‍ രണ്ട് യുവതികള്‍ക്കൊപ്പമുണ്ടായിരുന്നത് അച്ചായനാണെന്നാണ് സൂചന. പിടിയിലായ ആഷിഖിന്റെ ഭാര്യ മുബീന, വന്ദന എന്നിവരാണ് കാറിലുണ്ടായിരുന്നതെന്നും അന്വേഷണോദ്യോഗസ്ഥര്‍ പറയുന്നു.
പെണ്‍വാണിഭസംഘത്തിനൊപ്പം അറസ്റ്റിലായവരില്‍ ഒരാള്‍ 17 വയസ്സുള്ള പെണ്‍കുട്ടിയാണ്. ഈ കുട്ടി പലതവണ പീഡനത്തിനിരയായതായി വൈദ്യപരിശോധനയില്‍ തെളിഞ്ഞു. ഭീഷണിപ്പെടുത്തിയാണ് പെണ്‍വാണിഭസംഘം കുട്ടിയെ പലര്‍ക്കും നല്കിയതെന്ന് കണ്ടെത്തി.
മയക്കുമരുന്ന് ചേര്‍ത്ത പാനീയം നല്‍കി ബോധരഹിതയാക്കിയ ശേഷമാണ് ഈ പെണ്‍കുട്ടിയെ പീഡിപ്പിച്ചതെന്നും ഇതിന്റെ ചിത്രങ്ങള്‍ കാണിച്ചാണ് പെണ്‍വാണിഭത്തിന് ഉപയോഗിച്ചതെന്നും പോലീസ് പറഞ്ഞു.
ബെംഗളൂരുവില്‍നിന്ന് പെണ്‍കുട്ടികളെ പെണ്‍വാണിഭസംഘത്തിന് എത്തിച്ചുകൊടുത്ത ഇടനിലക്കാരി കോട്ടയം സ്വദേശിനി ലെനീഷ് മാത്യുവിന്റെ ബന്ധങ്ങളും പോലീസ് അന്വേഷിക്കുന്നുണ്ട്.
കോര്‍പ്പറേറ്റ് സ്ഥാപനത്തിന്റെ പ്രാദേശിക ഓഫീസിന്റെ മേലധികാരിയാണെന്ന് ഇവര്‍ അവകാശപ്പെട്ടിരുന്നു. പുറമെ ബെംഗളൂരുവില്‍ റിക്രൂട്ടിങ് ഏജന്‍സിയും നടത്തിയിരുന്നു. വിവിധ കേന്ദ്രസര്‍ക്കാര്‍ പദ്ധതികളുടെ കണ്‍സള്‍ട്ടന്‍സി ജോലിക്കെന്ന പേരില്‍ ഇവര്‍ ഉദ്യോഗാര്‍ത്ഥികളെ ഇന്റര്‍വ്യു ചെയ്തിരുന്നു. ഇതിന്റെ മറവില്‍ പെണ്‍വാണിഭസംഘത്തിലേക്കുള്ള റിക്രൂട്ടിങ്ങാണോ നടന്നതെന്നും പോലീസ് അന്വേഷിക്കുന്നുണ്ട്.
കൊച്ചിയിലെത്തിച്ച യെലഹങ്ക സ്വദേശിനിയായ പെണ്‍കുട്ടിയുടെ സഹോദരിയെ ജോലിവാഗ്ദാനം നല്‍കിയാണ് ലെനീഷ് മാത്യു പെണ്‍വാണിഭത്തില്‍ പങ്കാളിയാക്കിയത്. പിന്നീട് സഹോദരിേയയും ഇതില്‍ അകപ്പെടുത്തിയതായി ഉദ്യോഗസ്ഥര്‍ പറഞ്ഞു. കഴിഞ്ഞദിവസം കൊച്ചിയില്‍ പോലീസ് പിടിയിലായ പെണ്‍വാണിഭസംഘം ഇപ്പോള്‍ റിമാന്‍ഡിലാണ്.
Discussion about this post