കൊച്ചി : കൊച്ചിയിൽ യുവതിയെ ഫ്ലാറ്റിൽ മരിച്ച നിലയിൽ കണ്ടെത്തിയ സംഭവത്തിൽ കൂടുതൽ വിവരങ്ങൾ പുറത്ത്. കോഴിക്കോട് സ്വദേശിയായ വൈഷ്ണവിയാണ് മരിച്ചത്. ഇടുക്കി സ്വദേശി അലക്സ് ജേക്കബ് എന്ന യുവാവും യുവതിക്കൊപ്പമുണ്ടായിരുന്നു. ഇരുവരെയും ഞരമ്പ് മുറിച്ച നിലയിലാണ് കണ്ടെത്തിയത്. യുവാവിനെ ആശുപത്രിയിൽ പ്രവേശിപ്പിച്ചിരിക്കുകയാണ്.
രാവിലെ ഒൻപത് മണിയോടെ ചെമ്പുമുക്ക് എംഎൽഎ റോഡിലെ അപാർട്ട്മെന്റിൽ നിന്നും കരച്ചിൽ കേട്ടാണ് പ്രദേശവാസികൾ ഓടിയെത്തിയത്. കൈ ഞരമ്പ് മുറിച്ച് രക്തം വാർന്ന നിലയിലായിരുന്നു ഇരുവരും. അലക്സ് ജേക്കബിനെ ഉടൻ ആശുപത്രിയിലേക്ക് മാറ്റി. പക്ഷേ വൈഷ്ണവി അപ്പോഴേക്കും മരിച്ചിരുന്നു.
മൂന്ന് ആഴ്ച മുൻപാണ് യുവാവും യുവതിയും അപാർട്മെന്റിൽ താമസമാക്കിയത്. സുഹൃത്തുക്കളായ ഇരുവരും കൊച്ചിയിൽ ജോലി ചെയ്ത് വരികയായിരുന്നു. വൈഷ്ണവി ആത്മഹത്യ ചെയ്തതിന്റെ മാനസിക സംഘർഷത്തെ തുടർന്നാണ് താൻ ഞരമ്പ് മുറിച്ചത് എന്നാണ് യുവാവിന്റെ മൊഴി.
യുവതി ആത്മഹത്യ ചെയ്യാനുള്ള കാരണം വ്യക്തമായിട്ടില്ല. പോസ്റ്റ്മോർട്ടം റിപ്പോർട്ട് ലഭിച്ച ശേഷം സംഭവത്തെക്കുറിച്ച് വിശദമായ അന്വേഷണം നടത്തുമെന്ന് തൃക്കാക്കര പോലീസ് അറിയിച്ചു.
Discussion about this post