കൊച്ചി: നടൻ കാർത്തിയുടെ സിനിമയായ ജപ്പാന്റെ ടീസർ പുറത്ത് വിട്ടു. കാർത്തിയുടെ ജൻമദിനത്തിലാണ് ഹാപ്പി ബർത്ത്‌ഡേ ആശംസകളുമായി ടീസർ പുറത്തുവന്നിരിക്കുന്നത്. ജപ്പാൻ ആരാണ് എന്ന ചോദ്യവുമായിട്ടാണ് നിഗൂഢതകൾ ഒളിപ്പിക്കുന്ന ടീസർ അണിയിച്ച് ഒരുക്കിയിരിക്കുന്നത്.
മലയാളം, തമിഴ്, തെലുങ്ക്, കന്നഡ, എന്നീ ഭാഷകളിലാണ് ചിത്രം തിയറ്ററിലെത്തുന്നത്. ‘ആരാണ് ജപ്പാൻ? അവന് കുമ്പസാരത്തിന്റെ ആവശ്യമില്ല. ദൈവത്തിന്റെ അതിശയ സൃഷ്ടികളിൽ അവനൊരു ഹീറോയാണ്’ എന്ന ഡയലോഗോടെയാണ് ടീസർ ആരംഭിക്കുന്നത്. രാജു മുരുകൻ രചനയും സംവിധാനവും നിർവഹിക്കുന്ന സിനിമയിൽ കാർത്തിയുടെ നായികയാവുന്നത് മലയാളിയായ അനു ഇമ്മാനുവലാണ്.
ബ്രഹ്മാണ്ഡ ചിത്രമായിട്ടാണ് ജപ്പാൻ അണിയിച്ചൊരുക്കുന്നത്. ഡ്രീം വാരിയർ പിക്‌ചേഴ്‌സിന്റെ ബാനറിൽ എസ്.ആർ പ്രകാശ് ബാബു, എസ്.ആർ.പ്രഭു എന്നിവരാണ് ചിത്രം നിർമ്മിക്കുന്നത്. കാർത്തിയുടെ ഇരുപത്തി അഞ്ചാമത്തെ സിനിമയാണിത്. വ്യത്യസ്ത രൂപ ഭാവത്തിലുള്ള നായക കഥാപാത്രത്തെയാണ് കാർത്തി അവതരിപ്പിക്കുന്നത്. തൂത്തുക്കുടിയിലും കേരളത്തിലുമായാണ് ജപ്പാൻ ചിത്രീകരിക്കുന്നത്. ദീപാവലിക്ക് റിലീസ് ചെയ്യും.
തെലുങ്കിൽ ഹാസ്യനടനായി രംഗപ്രവേശം നടത്തി നായകനായും വില്ലനായും കീർത്തി നേടിയ നടൻ സുനിൽ ഈ സിനിമയിലൂടെ തമിഴിൽ ചുവടുവെക്കുന്നുണ്ട്. അല്ലു അർജുന്റെ ‘ പുഷ്പ’ യിൽ മംഗളം സീനു എന്ന വില്ലൻ വേഷം ചെയ്ത് കയ്യടി നേടിയ അഭിനേതാവാണ് സുനിൽ.
ഗോലി സോഡ, കടുക് എന്നീ സിനിമകൾ സംവിധാനം ചെയ്ത് ശ്രദ്ധേയനായ ഛായാഗ്രാഹകൻ വിജയ് മിൽട്ടനും പ്രധാന കഥാപാത്രത്തെ അവതരിപ്പിക്കുന്നുണ്ട്. പൊന്നിയിൻ സെൽവനിലൂടെ ലോകശ്രദ്ധ പിടിച്ചു പറ്റിയ രവി വർമ്മനാണ് ഛായാഗ്രാഹകൻ. ജി.വി പ്രകാശ് കുമാറാണ് സംഗീത സംവിധായകൻ. അനൽ- അരസ് സംഘട്ടന രംഗങ്ങൾ ഒരുക്കുന്നു.
