ചെന്നൈ: ഇന്ത്യൻ സംഗീതത്തെ ലോക പ്രസിദ്ധമാക്കാൻ എല്ലാ കലാകാരന്മാരും ഒറ്റക്കെട്ടായി പരിശ്രമിക്കണമെന്ന് സംഗീത സംവിധായകൻ എ.ആർ റഹ്‌മാൻ. രാജമൗലി ചിത്രം ആർആർആറിലെ നാട്ടു നാട്ടു എന്ന ഗാനം ഓസ്‌കർ ഉൾപ്പെടെയുള്ള ലോകോത്തര പുരസ്‌കാരങ്ങൾ നേടിയ പശ്ചാത്തലത്തിലാണ് അദ്ദേഹത്തിന്റെ പ്രതികരണം. ലോകത്തിന്റെ നെറുകയിൽ ഇന്ത്യൻ പതാക പാറിപ്പറക്കണമെന്നും അദ്ദേഹം പറഞ്ഞു.
ഇന്ത്യൻ സംഗീതത്തെ ലോകത്തിന്റെ നെറുകയിൽ എത്തിക്കേണ്ടതുണ്ട്. ഇതിനായി എല്ലാ കലാകാരന്മാരും ഒറ്റക്കെട്ടായി നിൽക്കുകയും കഠിനമായി പരിശ്രമിക്കുകയും വേണം. ഇന്ത്യൻ പതാക വാനോളം ഉയർത്തണം. ലോകത്തിന്റെ നെറുകയിൽ അത് പാറിപ്പറക്കണമെന്നും റഹ്‌മാൻ വ്യക്തമാക്കി.
ഓസ്‌കർ വേദിയിൽ തിളങ്ങിയ നാട്ടു നാട്ടു ഗാനത്തിന് ലോകമെമ്പാടും വലിയ പ്രീതിയാണ് ലഭിച്ചിരുന്നത്. ആദ്യമായി ഇത്രയേറെ ലോക പ്രശസ്തി നേടുന്ന പാട്ട് കൂടിയാണ് നാട്ടു നാട്ടു. കൊറിയയിൽ ഈ ഗാനം ഏറെ സ്വീകാര്യത നേടിയിരുന്നു. ഇതേക്കുറിച്ച് കഴിഞ്ഞ ദിവസം കൊറിയൻ വിദേശകാര്യമന്ത്രി സംസാരിക്കുകയും ചെയ്തിരുന്നു. ഇതിന്റെയെല്ലാം പശ്ചാത്തലത്തിൽ ആയിരുന്നു റഹ്‌മാന്റെ പ്രതികരണം.
