തന്നെ ഇന്ത്യൻ വരനായി ചിത്രീകരിച്ച് കൊണ്ടുള്ള എ.ഐ ക്യാമറ ചിത്രങ്ങളെ പുകഴ്ത്തി ടെസ്ല മേധാവി ഇലോൺ മസ്‌ക്. റോളിംഗ് ക്യാൻവാസ് പ്രസന്റേഷൻസ് എന്ന പേജാണ് ഇൻസ്റ്റഗ്രാമിൽ ചിത്രങ്ങൾ ആദ്യം പങ്കുവെച്ചത്. ഷെർവാണി പോലെയുള്ള ഇന്ത്യൻ വസ്ത്രങ്ങൾ ധരിച്ച് അതിഥികൾക്കൊപ്പം നൃത്തം ചെയ്യുന്നതും കുതിരപ്പുറത്ത് വരുന്നതുമായ ചിത്രങ്ങളാണിത്.
തനിക്ക് ഇത് വളരെ ഇഷ്ടപ്പെട്ടുവെന്നാണ് ചിത്രങ്ങൾ ട്വിറ്ററിൽ പങ്കുവച്ച് കൊണ്ട് മസ്‌ക് പറഞ്ഞത്. നാല് ദിവസങ്ങൾക്ക് മുൻപാണ് ചിത്രം സമൂഹമാദ്ധ്യമങ്ങളിൽ പ്രത്യക്ഷപ്പെട്ടത്. മസ്‌കിനെ ഇന്ത്യൻ വേഷത്തിൽ കാണിക്കുന്ന അഞ്ചോളം ചിത്രങ്ങളാണിത്. ഉത്തരേന്ത്യൻ രീതിയിലുള്ള വിവാഹ ചിത്രമാണിത്.
അതേസമയം ലോകസമ്പരുടെ പട്ടികയിൽ മസ്‌ക് വീണ്ടും ഒന്നാം സ്ഥാനം തിരിച്ച് പിടിച്ചു. പട്ടികയിൽ ഒന്നാം സ്ഥാനത്ത് ഉണ്ടായിരുന്ന ബെർനാഡ് അർനോൾട്ടിന്റെ ഓഹരികൾ ഇടിഞ്ഞതിന് പിന്നാലെയാണ് മസ്‌ക് വീണ്ടും ഒന്നാം സ്ഥാനത്തെത്തിയത്. പാരീസ് ട്രേഡിംഗിൽ അർനോൾട്ടിന്റെ എൽവിഎംഎച്ച് ഓഹരികൾ 2.6% ഇടിഞ്ഞിരുന്നു. ഇക്കഴിഞ്ഞ ഡിസംബറിലാണ് പട്ടികയിൽ ഒന്നാം സ്ഥാനത്ത് ഉണ്ടായിരുന്ന മസ്‌കിനെ അർനോൾട്ട് ആദ്യമായി മറികടക്കുന്നത്. സൂചിക പ്രകാരം മസ്‌കിന് 192.3 ബില്യൺ ഡോളറിന്റെ ആസ്തിയാണുള്ളത്. അർനോൾട്ടിന് 186.6 ബില്യൺ ഡോളറിന്റെ ആസ്തിയുമുണ്ട്.
Discussion about this post