തിരുവനന്തപുരം: സംസ്ഥാനത്ത് സ്വകാര്യ ബസുടമകൾ നടത്താനിരുന്ന സമരം മാറ്റിവച്ചു. സമരവുമായി ബന്ധപ്പെട്ട് മുഖ്യമന്ത്രിയുമായുള്ള ചർച്ച നടക്കാത്തതിനെ തുടർന്നാണ് സമരം മാറ്റിവച്ചത്. ഈ മാസം ഏഴ് മുതലയാരിന്നു ബസുടമകൾ അനിശ്ചിതകാല സമരം പ്രഖ്യാപിച്ചിരുന്നത്.
ലോക കേരള സഭയുടെ മേഖലാ സമ്മേളനത്തിൽ പങ്കെടുക്കാൻ മുഖ്യമന്ത്രി ഈ ആഴ്ച അമേരിക്കയിലേക്ക് തിരിക്കും. ഇതിന്റെ തിരക്കുകളിലാണ് നിലവിൽ അദ്ദേഹം. തിരിച്ചെത്തിയ ശേഷം വിഷയം ചർച്ച ചെയ്യാമെന്നാണ് ബസ് സംഘടനകൾക്ക് ലഭിച്ചിരിക്കുന്ന നിർദ്ദേശം. ചർച്ചയ്ക്ക് ശേഷമാകും ഇനി സമരം വേണമോ എന്ന കാര്യത്തിൽ തീരുമാനം എടുക്കുക.
ഇതിന് പുറമേ പെർമിറ്റ് പ്രശ്നം കോടതിയുടെ പരിഗണനയിലാണ്.വിദ്യാർത്ഥി കൺസഷൻ റിപ്പോർട്ട് ജൂൺ 15നു ശേഷം മാത്രമേ സർക്കാരിനു ലഭിക്കുകയുള്ളൂ. ഇതും സമരം മാറ്റിവയ്ക്കാനുള്ള കാരണങ്ങൾ ആണ്. സ്വകാര്യബസുകളുടെ പെർമിറ്റുകൾ അതേപടി പുതുക്കി നൽകുക, വിദ്യാർത്ഥികളുടെ യാത്രാനിരക്ക് വർദ്ധിപ്പിക്കുക എന്നിവയാണ് സ്വകാര്യ ബസ് ഉടമകളുടെ ആവശ്യം.
