തിരുവനന്തപുരം: സിപിഎം രാജ്യസഭാ എംപി ജോൺ ബ്രിട്ടാസിന് ഉരുളയ്ക്ക് ഉപ്പേരി പോലെ മറുപടി നൽകി ബിജെപി തമിഴ്‌നാട് അദ്ധ്യക്ഷൻ കെ അണ്ണാമലൈ. ഇന്ത്യാ ടുഡെ സൗത്ത് കോൺക്ലേവിലെ പാനൽ ചർച്ചയിലായിരുന്നു അണ്ണാമലൈ ബ്രിട്ടാസിന്റെ വായടപ്പിച്ചത്.
കേരളത്തിൽ തിരഞ്ഞെടുപ്പ് പ്രചാരണ ചെലവ് വളരെ കുറവാണെന്ന് പറഞ്ഞായിരുന്നു ബ്രിട്ടാസിന്റെ തുടക്കം. കർണാടക തിരഞ്ഞെടുപ്പിൽ ബിജെപി എത്ര തുകയാണ് ചിലവഴിച്ചത്. കഴിഞ്ഞ ലോക്‌സഭാ തിരഞ്ഞെടുപ്പിൽ ബിജെപി 50,000 കോടി രൂപ ചിലവഴിച്ചുവെന്നും ആരാണ് പ്രചാരണ ചിലവിന്റെ ബാർ ഉയർത്തിയതെന്നും ബ്രിട്ടാസ് ചോദിച്ചു.
ഇതിന് പിന്നാലെ ആയിരുന്നു അണ്ണാമലൈയുടെ മറുപടി. 50,000 കോടിയാണെങ്കിൽ
ഒരു സംസ്ഥാനത്ത് എത്ര കോടിയെന്ന് കണക്ക് കൂട്ടി നോക്കണം. അതേ കണക്കുമായി മുന്നോട്ടുപോകുകയാണെങ്കിൽ താങ്കൾ ഒന്നാം ക്ലാസ് മുതൽ വീണ്ടും കണക്ക് പഠിക്കേണ്ടിവരുമെന്നും അണ്ണാമലൈ പരിഹസിച്ചു.
എന്നാൽ എന്ത് അടിസ്ഥാനത്തിലാണ് 50,000 കോടി എന്ന് പറഞ്ഞതെന്ന് ചർച്ചയിൽ മോഡറേറ്ററായിരുന്ന രജ്ദീപ് സർദേശായി ചോദിച്ചെങ്കിലും ബ്രിട്ടാസിന് കൃത്യമായ മറുപടിയില്ലായിരുന്നു. അവർ ചെയ്തത് എന്താണെന്ന് വെറുതെ പരിശോധിച്ചാൽ മതിയെന്ന തട്ടിക്കൂട്ട് മറുപടിയിൽ ബ്രിട്ടാസ് കൈകഴുകി.
തെലങ്കാന, കർണാടക തുടങ്ങിയ ദക്ഷിണേന്ത്യൻ സംസ്ഥാനങ്ങളിൽ പോലും പ്രചാരണ ചിലവ് ഉയർന്നതായും ബിജെപിയാണ് രാജ്യം മുഴുവൻ ഈ ചിലവ് ഉയർത്തുന്നതെന്നും ബ്രിട്ടാസ് പറഞ്ഞു. കേരളത്തിൽ അഞ്ച് വർഷം മുൻപ് 15 ശതമാനമായിരുന്നു ബിജെപിയുടെ വോട്ടെന്ന് ബ്രിട്ടാസ് പറയുന്നു. ഇപ്പോൾ അത് 12 ശതമാനമായി താഴ്ന്നു. പ്രചാരണ ചിലവ് കേരളത്തിൽ ഉയരാത്തത് ബിജെപിയെ ഒഴിവാക്കി നിർത്തിയത് കൊണ്ടാണെന്നും ബ്രിട്ടാസ് ആരോപിച്ചു.
