ന്യൂഡൽഹി: പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി ഓപ്പൺ എ ഐ യുടെ സിഇഒ സാം ആൾട്ട് മാൻ. ഔദ്യോഗിക വസതിയിൽ എത്തിയായിരുന്നു ആൾട്ട് മാൻ പ്രധാനമന്ത്രിയുമായി കൂടിക്കാഴ്ച നടത്തിയത്. സാങ്കേതിക വിദ്യയുമായി ബന്ധപ്പെട്ട നിരവധി കാര്യങ്ങളെക്കുറിച്ച് ഇരുവരും തമ്മിൽ ചർച്ച ചെയ്തു.
ആൾട്ട് മാനുമായി കൂടിക്കാഴ്ച നടത്തിയ വിവരം പ്രധാനമന്ത്രിയാണ് ട്വിറ്ററിലൂടെ അറിയിച്ചത്. സാം ആൾട്ട്മാന്റെ ട്വീറ്റ് റീ ട്വീറ്റ് ചെയ്തുകൊണ്ടായിരുന്നു പ്രധാനമന്ത്രിയുടെ പ്രതികരണം. സാം ആൾട്ട്മാനുമായി സംസാരിക്കാൻ കഴിഞ്ഞതിൽ അതിയായ സന്തോഷമുണ്ടെന്ന് പ്രധാനമന്ത്രി പറഞ്ഞു. ഇന്ത്യയുടെ സാങ്കേതിക രംഗം എഐ ഉപയോഗിച്ച് മികച്ചതാക്കുന്നത് വലിയ ജോലിയാണ്. പ്രത്യേകിച്ച് യുവാക്കൾക്കിടയിലെ ഉപയോഗപ്പെടുത്തൽ. ഇന്ത്യയുടെ സാങ്കേതിക രംഗം മികച്ചതാക്കി ആളുകളെ ശക്തിപ്പെടുത്തുന്നതിനുള്ള എല്ലാ പ്രവർത്തനങ്ങളെയും രാജ്യം സ്വാഗതം ചെയ്യുമെന്നും പ്രധാനമന്ത്രി പറഞ്ഞു.
ഇന്ത്യയുടെ സാങ്കേതിക രംഗത്തെക്കുറിച്ച് പ്രധാനമന്ത്രി നേരേന്ദ്ര മോദിയുമായി വിശദമായി സംസാരിച്ചതായി സാം ആൾട്ട്മാനും ട്വിറ്ററിൽ കുറിച്ചു. എഐ സാങ്കേതിക വിദ്യ രാജ്യത്തിന്റെ വികസനത്തിന് എത്രത്തോളം ഗുണം ചെയ്യമെന്നതിനെക്കുറിച്ചും കൂടിക്കാഴ്ചയിൽ സംസാരിച്ചു. പ്രധാനമന്ത്രിയുൾപ്പെടെയുള്ളവരുമായുള്ള കൂടിക്കാഴ്ച വളരെ ആസ്വാദ്യകരമായിരുന്നുവെന്നും അദ്ദേഹം ട്വീറ്റ് ചെയ്തു.
നിലവിൽ എഐ സാങ്കേതിക വിദ്യയുടെ വികാസവുമായി ബന്ധപ്പെട്ട് വിവിധ രാജ്യങ്ങളിൽ പര്യടനം നടത്തുകയാണ് ആൾട്ട് മാൻ. ഇസ്രായേൽ, ഖത്തർ, ജോർദാൻ, യുഎഇ, സൗത്ത് കൊറിയ എന്നീ രാജ്യങ്ങളിൽ സന്ദർശനം നടത്തിയിരുന്നു. ഇതിന് ശേഷമാണ് അദ്ദേഹം ഇന്ത്യയിൽ എത്തിയത്.
Discussion about this post