കൊച്ചി: മോൻസൻ മാവുങ്കൽ കേസുമായി യാതൊരു ബന്ധവും ഇല്ലെന്ന് കെപിസിസി പ്രസിഡന്റ് കെ.സുധാകരൻ എംപി. മോൻസൻ മാവുങ്കൽ മുഖ്യപ്രതിയായ പുരാവസ്തു തട്ടിപ്പു കേസിൽ വഞ്ചനക്കുറ്റം ചുമത്തി ക്രൈംബ്രാഞ്ച് രണ്ടാം പ്രതിയാക്കിയതിന് പിന്നാലെയാണ് സുധാകരന്റെ വിശദീകരണം. പരാതിക്കാരുമായി യാതൊരു ബന്ധവും ഇല്ല. നേരത്തെ തനിക്കെതിരെ പരാതിയില്ലെന്ന് പറഞ്ഞത് കൊണ്ടാണ് എതിർ പരാതി നൽകാതിരുന്നത്. അന്വേഷണസംഘത്തിന് മുൻപാകെ ഹാജരാകില്ലെന്നും സുധാകരൻ പറഞ്ഞു.
” സാവകാശം തന്നില്ലെങ്കിൽ നിയമപരമായി നേരിടും. നിയമനടപടികൾ അഭിഭാഷകരുമായി ആലോചിക്കുകയാണ്. ഞാൻ പാർലമെന്റിലെ ധനകാര്യ സ്ഥിരംസമിതി അംഗമായിരുന്നില്ല. കേസിലെ പരാതിക്കാരെ അറിയില്ല. എന്നെയും സതീശനെയും കേസിൽ കുരുക്കാമെന്ന് വ്യാമോഹിക്കുന്ന പിണറായി മൂഢസ്വർഗത്തിലാണ് ജീവിക്കുന്നത്. മോൻസനെ കാണുമ്പോൾ ആ മൂന്ന് പേർ അവിടെ ഉണ്ടായിരുന്നു. അവർ ആരാണെന്ന് അറിയില്ലെന്നും” സുധാകരൻ പറഞ്ഞു. നാളെ കളമശേരിയിലെ ക്രൈംബ്രാഞ്ച് ഓഫീസിൽ നേരിട്ട് ഹാജരാകാനാണ് സുധാകരന് നോട്ടീസ് നൽകിയിരുന്നത്. അറസ്റ്റിന് തയ്യാറെടുക്കുന്ന അന്വേഷണസംഘം ഇക്കാര്യത്തിൽ നിയമോപദേശവും തേടിയതായാണ് വിവരം.
മോൻസന്റെ തട്ടിപ്പിനിരയായ യാക്കൂബ് പുറായിൽ, സിദ്ദിഖ് പുറായിൽ, അനൂപ് വി.അഹമ്മദ്, സലീം എടത്തിൽ, എം.ടി.ഷമീർ, ഷാനിമോൻ എന്നിവർ മുഖ്യമന്ത്രിക്കു നൽകിയ പരാതിയിൽ നടത്തിയ അന്വേഷണത്തിൽ സുധാകരനെ പ്രതിയാക്കാവുന്ന തെളിവുകൾ ലഭിച്ചെന്നാണ ക്രൈംബ്രാഞ്ച് പറയുന്നത്. വഞ്ചനാക്കുറ്റം ചുമത്തിയാണ് കെ സുധാകരനെ ക്രൈംബ്രാഞ്ച് പ്രതി ചേർത്തത്. സുധാകരൻറെ സാന്നിധ്യത്തിലാണ് മോൻസൻ മാവുങ്കലിന് 25 ലക്ഷം രൂപ കൈമാറിയതെന്ന് പരാതിക്കാർ ക്രൈംബ്രാഞ്ചിനെ രേഖാമൂലം അറിയിച്ചത്. 2018 നവംബർ 22ന് മോൻസൻറെ കലൂരിലുള്ള വീട്ടിൽവച്ചാണ് പണം കൈമാറിയത്. അന്ന് പാർലമെന്റിലെ ധനകാര്യ സ്ഥിരസമിതി അംഗമായിരുന്ന സുധാകരൻ ആ പദവി ഉപയോഗിച്ചു സഹായിക്കുമെന്ന ഉറപ്പിലാണ് പണം നൽകിയതെന്നും പരാതിക്കാർ പറയുന്നു.
