അഹമ്മദാബാദ്: ബിപോർജോയ് ചുഴലിക്കാറ്റ് തീരത്തേക്ക് തീരത്തേക്ക് അടുക്കുന്നതിനിടെ ഗുജറാത്തിൽ ഭൂചലനം. ചുഴലിക്കാറ്റ് രൂക്ഷമായി ബാധിക്കുന്ന കച്ചിലാണ് ഭൂചലനം ഉണ്ടായത്. സംഭവത്തിൽ ആളപായമോ നാശനഷ്ടമോ ഉണ്ടായിട്ടില്ലെന്ന് അധികൃതർ അറിയിച്ചു.
റിക്ടർ സ്കെയിലിൽ 3.5 തീവ്രത രേഖപ്പെടുത്തിയ ഭൂചലനം ആണ് ഉണ്ടായത്. ഇന്നലെ വൈകീട്ട് അഞ്ചേ കാലോടെയായിരുന്നു ഭൂചലനം അനുഭവപ്പെട്ടത് എന്നാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. ബാച്ചൗ, കച്ച് എന്നിവിടങ്ങളിൽ അഞ്ച് കിലോമീറ്റർ പരിധിയിൽ പ്രകമ്പനം അനുഭവപ്പെട്ടു.
ഇന്നലെ ജമ്മു കശ്മീരിൽ തുടർച്ചയായി മൂന്ന് ഭൂചലനങ്ങൾ അനുഭവപ്പെട്ടിരുന്നു. ഇതിന് പിന്നാലെയായിരുന്നു കച്ചിലും ഭൂചലനം ഉണ്ടായത്. ബിപോർജോയ് തീരത്തേക്ക് അടുക്കുന്ന സാഹചര്യത്തിൽ വലിയ ഭയത്തിലാണ് കച്ചിലെ ജനങ്ങൾ. ഇതിനിടെയുണ്ടായ ഭൂചലനം ഇവരുടെ പരിഭ്രാന്തി ഇരട്ടിയാക്കി.
അതേസമയം ഇന്ന് ബിപോർജോയ് കരതൊടും. നിലവിൽ ശക്തമായ കാറ്റും മഴയുമാണ് ഇവിടെ അനുഭവപ്പെടുന്നത്. ഏത് സാഹചര്യവും നേരിടാൻ സജ്ജമാണെന്ന് അധികൃതർ അറിയിച്ചിട്ടുണ്ട്. ഇതിനോടകം തന്നെ 74,000 അധികം പേരെ സുരക്ഷിത സ്ഥാനത്തേക്ക് മാറ്റിയിട്ടുണ്ട്.
