മുംബൈ: ഇന്ത്യൻ ക്രിക്കറ്റ് താരം വിരാട് കോഹ്ലിയുടെ സ്വത്ത് മൂല്യം ആയിരം കോടി കടന്നതായി റിപ്പോർട്ട്. ബംഗളൂരു ആസ്ഥാനമായുള്ള ട്രേഡിംഗ് ആൻഡ് ഇൻവെസ്റ്റ്മെന്റ് കമ്പനിയായ സ്‌റ്റോക് ഗ്രോ പുറത്ത് വിട്ട കണക്കുകൾ പ്രകാരം വിരാട് കോഹ്ലിയുടെ സ്വത്തിന്റെ മൂല്യം 1050 കോടി രൂപയാണ്. സമൂഹമാദ്ധ്യമങ്ങളിൽ ഏറ്റവും കൂടുതൽ ഫോളോവേഴ്‌സുള്ള കായിക താരങ്ങളിൽ ഒരാൾ കൂടിയാണ് കോഹ്ലി. ഏഴ് കോടി രൂപയാണ് ബിസിസിഐയുടെ വാർഷിക ശമ്പളമായി കോഹ്ലിക്ക് ലഭിക്കുന്നത്. ഐപിഎല്ലിൽ റോയൽ ചാലഞ്ചേഴ്‌സ് ബാംഗ്ലൂർ ഒരു സീസണിന് 15 കോടി നൽകും. ഇതിനു പുറമേ കളിക്കുന്ന ഓരോ മത്സരങ്ങൾക്കും മാച്ച് ഫീസ് വേറെ ലഭിക്കും.
252 മില്യൺ ആളുകളാണ് കോഹ്ലിയെ ഇൻസ്റ്റഗ്രാമിൽ ഫോളോ ചെയ്യുന്നത്. ഇൻസ്റ്റഗ്രാമിൽ കോഹ്ലിയുടെ ഒരു പോസ്റ്റിന്റെ വില 8.90 കോടി രൂപയാണ്. ഒരു ട്വീറ്റിന് 2.50 കോടിയും കോഹ്ലി വാങ്ങുന്നുണ്ടെന്നാണ് കണക്കുകൾ പറയുന്നത്. ഇതിനെല്ലാം പുറമേ നിരവധി ബ്രാൻഡുകളിലും നിന്നും സ്റ്റാർട്ട് അപ്പുകളിൽ നിന്നും കോടികളാണ് കോഹ്ലിയുടെ വരുമാനം. എട്ട് സ്റ്റാർട്ടപ്പുകളിലാണ് കോഹ്ലി നിക്ഷേപം നടത്തിയിട്ടുള്ളത്. പതിനെട്ടിലേറെ ബ്രാൻഡുകളുമായിട്ടാണ് കോഹ്ലി സഹകരിക്കുന്നത്. ഇതിന്റെയെല്ലാം പരസ്യ ചിത്രീകരണത്തിൽ നിന്നും 7.50 മുതൽ 10 കോടി രൂപ വരെയാണ് താരം ഈടാക്കുന്നത്. ബ്രാൻഡ് എൻഡോർസ്‌മെന്റിലൂടെ മാത്രം 175 കോടി രൂപയാണ് കോഹ്ലിയുടെ വരുമാനം.
ഇതിനെല്ലാം പുറമേ, മുംബൈയിൽ 34 കോടി രൂപയുടെ വസതി, ഗുരുഗ്രാമിൽ 80 കോടി മൂല്യമുള്ള വീടും താരത്തിനുണ്ട്. 31 കോടിയോളം വില മതിക്കുന്ന ആഡംബര കാറുകളുടെ ശേഖരവുമുണ്ട്. ക്രിക്കറ്റിനു പുറത്ത്, എഫ്‌സി ഗോവ, ഒരു ടെന്നീസ് ടീം, പ്രോ-ഗുസ്തി ടീമിന്റേയും ഉടമ കൂടിയാണ് നമ്മുടെ വിരാട് കോഹ്ലി.
Discussion about this post