കൊച്ചി: ഷൈൻ ടോം ചാക്കോയും ശ്രീനാഥ് ഭാസിയും വിഷ്ണു ഉണ്ണികൃഷ്ണനും ഒരുമിക്കുന്ന ഡാൻസ് പാർട്ടിയുടെ ഫസ്റ്റ് ലുക്ക് പോസ്റ്റർ സമൂഹമാദ്ധ്യമങ്ങളിൽ ശ്രദ്ധ നേടുന്നു. പുതിയ പ്രൊഡക്ഷൻ ബാനറായ ഓൾഗ പ്രൊഡക്ഷൻസ് നിർമിക്കുന്ന ചിത്രം സോഹൻ സീനുലാൽ ആണ് സംവിധാനം.
പ്രിഥ്വിരാജിന്റേയും ദുൽഖർ സൽമാന്റേയും സോഷ്യൽ മീഡിയ പേജുകളിലൂടെയാണ് ഫസ്റ്റ് ലുക്ക് പോസ്റ്റർ പുറത്തുവിട്ടത്. ഡാൻസും പാട്ടുമൊക്കെയായി ആഘോഷത്തോടെ ജീവിതം മുന്നോട്ട് കൊണ്ട് പോകുന്ന യുവാക്കളുടെ കഥയാണ് ചിത്രം പറയുന്നത്. നേരത്തെ തന്നെ പല വേദികളിലും വൈറൽ ഡാൻസുകളുമായി ഷൈൻ ടോം ചാക്കോ ശ്രദ്ധ നേടിയിട്ടുണ്ട്. അതുകൊണ്ടു തന്നെ ഡാൻസ് പാർട്ടിയിലെ ഷൈൻ ടോം ചാക്കോയുടെ വേഷം ആരാധകരും ആവേശത്തോടെയാണ് കാത്തിരിക്കുന്നത്.
ഷൂട്ടിംഗ് പൂർത്തിയാക്കിയ ചിത്രം പോസ്റ്റ് പ്രൊഡക്ഷൻ വർക്കുകളിലാണ്. ബിനു കുര്യൻ ഛായാഗ്രഹണം നിർവഹിക്കുന്ന ചിത്രത്തിന്റെ തിരക്കഥയും സോഹൻ സീനുലാൽ തന്നെയാണ്. വിലക്ക്, വിവാദങ്ങൾക്ക് ശേഷം ശ്രീനാഥ് ഭാസി ആദ്യമായി അഭിനയിക്കുന്ന സിനിമയെന്ന പ്രത്യേകതയുമുണ്ട്.
ജൂഡ് ആന്തണി ജോസഫ്, ഫുക്രു, സാജു നവോദയ, ലെന, പ്രയാഗ മാർട്ടിൻ, ശ്രദ്ധ ഗോകുൽ, ജോളി ചിറയത്ത്, പ്രീതി, മെക്കാർട്ടിൻ, അഭിലാഷ് പട്ടാളം, നാരായണൻകുട്ടി, ബിനു തൃക്കാക്കര, ഫൈസൽ, ഷിനിൽ, ഗോപാൽജി, ജാനകി ദേവി, അമാര, സിജി, സുശീൽ, ബിന്ദു, നസീർഖാൻ, അപ്പാക്ക, ഫ്രഡി, തിരു, സുരേഷ് നായർ, എൽദോ സുമേഷ്, ഡോക്ടർ ശശികാന്ത്, വർഗീസ് എന്നിവരാണ് മറ്റു താരങ്ങൾ.
റെജി പ്രോത്താസിസ്, നൈസി റെജി ദമ്പതിമാരാണ് ഓൾഗ പ്രൊഡക്ഷൻസിന്റെ അമരക്കാർ.
