ന്യൂഡൽഹി: ഏകീകൃത സിവിൽ കോഡ് നടപ്പിലാക്കുന്നതിൽ സർക്കാരിന് പിന്തുണയുമായി ആം ആദ്മി പാർട്ടി. ഭരണഘടനയിലെ ആർട്ടിക്കിൾ 44 ൽ ഇക്കാര്യം പരാമർശിക്കുന്നുണ്ടെന്നും അതുകൊണ്ടു തന്നെ സർക്കാർ നീക്കത്തെ ആം ആദ്മി പാർട്ടി തത്വാധിഷ്ഠിതമായി പിന്തുണയ്ക്കുകയാണെന്നും പാർട്ടി ദേശീയ ജനറൽ സെക്രട്ടറി സന്ദീപ് പഥക് പറഞ്ഞു.
കോൺഗ്രസ് അടക്കമുളള രാഷ്ട്രീയ പാർട്ടികൾ സർക്കാരിനെ അന്ധമായി എതിർക്കുന്നത് തുടരുമ്പോഴാണ് പ്രതിപക്ഷ ചേരിയിൽ നിന്നും ആം ആദ്മിയുടെ പിന്തുണ. നിയമത്തെ ശക്തമായി എതിർക്കുമെന്ന് മുസ്ലീം ലീഗും മുസ്ലീം വ്യക്തി നിയമബോർഡും വ്യക്തമാക്കിയതിന് പിന്നാലെയാണ് ആം ആദ്മി പാർട്ടിയുടെ പിന്തുണയെന്നതും ശ്രദ്ധേയമാണ്. പ്രതിപക്ഷ ഐക്യത്തിനായി പരവതാനി വിരിച്ച് കാത്തിരിക്കുന്ന കോൺഗ്രസ് ഉൾപ്പെടെയുളള രാഷ്ട്രീയ പാർട്ടികൾക്ക് എഎപി നിലപാട് തിരിച്ചടി നൽകുന്നുണ്ട്.
സമൂഹത്തിലെ എല്ലാ വിഭാഗങ്ങളുമായും ആശയവിനിമയവും ചർച്ചയും നടത്തിയ ശേഷം മാത്രമേ ഏകീകൃത സിവിൽ കോഡ് നടപ്പാക്കാവൂ എന്ന് ആം ആദ്മി പാർട്ടി അഭിപ്രായപ്പെട്ടു. ഇത്തരം വിഷയങ്ങളിൽ അഭിപ്രായ ഐക്യം ഉറപ്പിച്ച് മുൻപോട്ട് പോകുന്നതാണ് രീതിയെന്നും സന്ദീപ് പഥക് സൂചിപ്പിക്കുന്നു.
ഏകീകൃത സിവിൽ കോഡിനായി പ്രധാനമന്ത്രി നരേന്ദ്രമോദി കഴിഞ്ഞ ദിവസം ശക്തമായി രംഗത്തെത്തിയിരുന്നു. എങ്ങനെയാണ് രണ്ട് തരത്തിലുളള നിയമവുമായി ഒരു രാജ്യത്ത് മുൻപോട്ടു പോകുന്നതെന്നും എല്ലാവർക്കും തുല്യത ഉറപ്പാക്കുമെന്നും ആയിരുന്നു പ്രധാനമന്ത്രിയുടെ വാക്കുകൾ.
Discussion about this post