ന്യൂഡൽഹി: യുകെ സുരക്ഷാ ഉപദേഷ്ടാവ് ടിം ബാരോയുമായി ദേശീയ സുരക്ഷാ ഉപദേഷ്ടാവ് അജിത് ഡോവൽ ഇന്ന് കൂടിക്കാഴ്ച നടത്തും. ന്യൂഡൽഹിയിൽ നടക്കുന്ന കൂടിക്കാഴ്ചയിൽ ഭീകരവാദവും ഭീകരവാദി നേതാക്കളുടെ ദുരൂഹ മരണങ്ങളും ഖാലിസ്ഥാൻ ഭീകരരുടെ ഇന്ത്യാ വിരുദ്ധ പ്രചാരണങ്ങളും ചർച്ചയാകും.
ഇരു രാഷ്ട്രങ്ങളുടെ സുരക്ഷയെയും പൊതുവിൽ ബാധിച്ചേക്കാവുന്ന വിഷയങ്ങളും കൂടിക്കാഴ്ചയിൽ ചർച്ചയാകും. ലണ്ടനിലെ ഇന്ത്യൻ സ്ഥാനപതി കാര്യാലയത്തിന് മുന്നിൽ ത്രിവർണ പതാകയെ അപമാനിച്ച സംഭവത്തിൽ ഇന്ത്യയുടെ അതൃപ്തി ഡോവൽ നേരിട്ട് ബാരോയെ അറിയിക്കും. സംഭവത്തിൽ ഡൽഹി പോലീസ് എഫ് ഐ ആർ തയ്യാറാക്കിയതിന്റെയും കേസ് കേന്ദ്ര ആഭ്യന്തര മന്ത്രി അമിത് ഷായുടെ നിർദേശ പ്രകാരം എൻ ഐ എ ഏറ്റെടുത്തതിന്റെയും വിവരങ്ങൾ അജിത് ഡോവൽ യുകെ സുരക്ഷാ ഉപദേഷ്ടാവിന് കൈമാറും.
യുകെ ആസ്ഥാനമായി പ്രവർത്തിക്കുന്ന ഖാലിസ്ഥാൻ ലിബറേഷൻ ഫോഴ്സ് നേതാക്കളായ അമൃത്പാൽ സിംഗും അവതാർ സിംഗ് ഖാൻഡയും ജൂൺ 15ന് ദുരൂഹസാഹചര്യത്തിൽ ബിർമിംഗ്ഹാമിൽ മരണപ്പെട്ടിരുന്നു. ഇതിനെ കുറിച്ചും ഇരു നേതാക്കളും ചർച്ച നടത്തും. കൂടാതെ, ഖാലിസ്ഥാൻ അനുകൂലികൾ നടത്തുന്ന ഇന്ത്യാ വിരുദ്ധ പ്രചാരണങ്ങളിൽ ഇന്ത്യയുടെ പ്രതിഷേധം ഡോവൽ ബാരോയെ അറിയിക്കും. യുകെയിലെ ഇന്ത്യൻ നയതന്ത്ര ഉദ്യോഗസ്ഥരുടെയും കാര്യാലയത്തിന്റെയും സുരക്ഷ ഉറപ്പ് വരുത്തുന്നതിന് ശക്തമായ നടപടികൾ സ്വീകരിക്കാനും അജിത് ഡോവൽ യുകെ സുരക്ഷാ ഉപദേഷ്ടാവ് ടിം ബാരോയോട് ആവശ്യപ്പെടും.
