ന്യൂഡൽഹി: ടാങ്കുകളും കവചിത വാഹനങ്ങളുമായി അതിർത്തിയെ പ്രകമ്പനം കൊള്ളിച്ച് ഇന്ത്യൻ സൈന്യം. ലഡാക്കിലെ ചൈന അതിർത്തിക്ക് സമീപമാണ് ഇന്ത്യൻ സൈന്യത്തിൻറെ പരിശീലനം അരങ്ങേറിയത്. ചൈന, പാകിസ്താൻ തുടങ്ങിയ ശത്രു രാജ്യങ്ങൾ ഇന്ത്യക്ക് നേരെ കണ്ണുയർത്തിയാൽ തകർത്തുകളയുമെന്ന മുന്നറിയിപ്പ് പോലെയാണ് ഇന്ത്യൻ സൈന്യത്തിന്റെ ഈ കരുനീക്കം. കശ്മീർ താഴ്വരകളിലായാലും രാജ്യത്തിന്റെ അതിർത്തിയിലായാലും, ഇന്ത്യൻ സൈനികർ എല്ലാ സമയത്തും സജ്ജരാണ്. പ്രതികൂല സാഹചര്യമുണ്ടായാൽ ശത്രുവിന് തക്ക മറുപടി നൽകാൻ അവർ ജാഗരൂകരാണ്.
ഇതിനായാണ് ഇന്ത്യൻ സൈനികർ അതിർത്തി പ്രദേശങ്ങളിൽ ഇടയ്ക്കിടെ പരിശീലനത്തിൽ ഏർപ്പെടുന്നത്. ലോകത്തിലെ ഏറ്റവും ഉയരം കൂടിയ നദീതടങ്ങളിൽ ഒന്നായ സിന്ധു നദി മുറിച്ചുകടക്കാനും ശത്രുസ്ഥാനങ്ങൾ ആക്രമിക്കാനുമുള്ള തന്ത്രങ്ങളാണ് കിഴക്കൻ ലഡാക്കിൽ പരിശീലിച്ചത്. അഭ്യാസപ്രകടനത്തിൽ ധാരാളം ടാങ്കുകളും കവചിത വാഹനങ്ങളും പങ്കാളികളായി.
T-90, T-72 ടാങ്കുകൾ, BMP ഇൻഫൻട്രി കോംബാറ്റ് വാഹനങ്ങൾ എന്നിവയുൾപ്പെടെ വൻ ടാങ്കുകളുമായാണ് ഇന്ത്യൻ സൈന്യം സിന്ധു നദി മുറിച്ചുകടക്കാൻ പ്രത്യേക അഭ്യാസം നടത്തിയത്. പാകിസ്താനിലേക്ക് കടക്കുന്നതിന് മുമ്പ്, ചൈനീസ് സൈന്യത്തിന്റെ നിയന്ത്രണത്തിലുള്ള ടിബറ്റൻ പ്രദേശത്തിലൂടെയാണ് സിന്ധു ലഡാക്ക് സെക്ടറിലൂടെ ഒഴുകുന്നത് . ആകസ്മികമായ സാഹചര്യങ്ങൾ നേരിടാൻ തയ്യാറെടുക്കുന്നതിനാണ് ഇത്തരം അഭ്യാസങ്ങൾ നടത്തുന്നതെന്ന് ഇന്ത്യൻ ആർമി ഉദ്യോഗസ്ഥർ പറഞ്ഞു. 16,000 അടി വരെ ഉയരത്തിലും ധാരാളം ടാങ്കുകളിലും പ്രവർത്തിക്കുന്ന ലോകത്തിലെ ചുരുക്കം സേനകളിലൊന്നാണ് ഇന്ത്യൻ സൈന്യം. ഏതു പ്രതികൂല സാഹചര്യങ്ങളെയും നേരിടാൻ ഇന്ത്യൻ സൈന്യത്തിന് കഴിയുമെന്നാണ് സൈനിക പരിശീലനം തെളിയിക്കുന്നത്. അതിർത്തി കീഴടക്കാൻ ശത്രുക്കൾ ശ്രമിക്കുമ്പോൾ അതിന് തക്കതായ മറുപടി നൽകുമെന്ന ഇന്ത്യൻ സൈന്യത്തിന്റെ തയ്യാറെടുപ്പുകളുടെ തെളിവ് കൂടിയായിരുന്നു അഭ്യാസപ്രകടനം.
ലഡാക്കിൽ ധാരാളം ടാങ്കുകളും കവചിത യുദ്ധ വാഹനങ്ങളും ഇന്ത്യൻ സൈന്യം വിന്യസിച്ചിട്ടുണ്ടെന്ന റിപ്പോർട്ടുകൾ പുറത്തുവന്നിരുന്നു. കിഴക്കൻ ലഡാക്ക് സെക്ടറിലെ ചൈനയുടെ ആക്രമണത്തിന് ശേഷമാണ് ഇന്ത്യയുടെ ഈ സൈനിക നീക്കം. നേരത്തെ, പാകിസ്താൻ അതിർത്തിയിലെ പഞ്ചാബ് സെക്ടറിൽ ഇന്ത്യൻ സൈന്യം വലിയ രീതിയിൽ ഇത്തരം അഭ്യാസങ്ങൾ നടത്തിയിരുന്നു. എന്നാൽ ഇപ്പോൾ ലഡാക്കിൽ ഇത്തരമൊരു അഭ്യാസം നടത്തി ഏത് ശത്രുവിനെയും തങ്ങൾക്ക് നിഷ്പ്രയാസം പരാജയപ്പെടുത്താൻ കഴിയുമെന്ന് ഇന്ത്യൻ സൈന്യം തെളിയിക്കുകയാണ്.
