ഇന്ത്യയുടെ പ്രതിരോധ ഗവേഷണ വികസന സംഘടനയായ ഡി.ആർ.ഡി.ഒ വികസിപ്പിക്കുന്ന അത്യാധുനിക ഡ്രോൺ പദ്ധതിക്കായി പ്രമുഖ ഇന്ത്യൻ വ്യവസായ ഗ്രൂപ്പായ ഭാരത് ഫോർജും ആഗോള വിമാന എഞ്ചിൻ നിർമ്മാതാക്കളായ പ്രാറ്റ് ആൻഡ് വിറ്റ്‌നി കാനഡയും പങ്കാളിത്തത്തിൽ ഏർപ്പെട്ടു. ഉയർന്ന ഉയരത്തിൽ കൂടുതൽ സമയം പറക്കാൻ ശേഷിയുള്ള ഹൈ ആൾട്ടിറ്റ്യൂഡ് ലോംഗ് എൻഡ്യൂറൻസ് അഥവാ ഹെയ്ൽ എന്ന് വിളിക്കുന്ന അൺമാൻഡ് ഏരിയൽ വെഹിക്കിൾ പദ്ധതിയിലേക്കാണ് ഇരുകമ്പനികളും ഒരുമിക്കുന്നത്. ഡി.ആർ.ഡി.ഒ രൂപകൽപ്പന ചെയ്യുന്ന ഈ അത്യാധുനിക അറ്റാക്ക് ഡ്രോണുകളിൽ നൂതന ടർബോപ്രോപ്പ് എഞ്ചിനുകൾ ഘടിപ്പിക്കുന്നതിന്റെ കാര്യക്ഷമതയും സാധ്യതകളുമാണ് കമ്പനികൾ സംയുക്തമായി പരിശോധിക്കുന്നത്.
ഈ സുപ്രധാന സഹകരണത്തിൽ പ്രാറ്റ് ആൻഡ് വിറ്റ്‌നി കാനഡ ടർബോപ്രോപ്പ് എഞ്ചിനുകളുടെ പ്രകടനം, എഞ്ചിൻ അനുയോജ്യത, ഘടനാപരമായ ആവശ്യകതകൾ എന്നിവ വിലയിരുത്തും. ഭാരത് ഫോർജ് ലിമിറ്റഡ് തങ്ങളുടെ എഞ്ചിനീയറിംഗ് പ്രഗത്ഭ്യവും ഉൽപ്പാദന ശേഷിയും ഉപയോഗിച്ച് ഡ്രോണിന്റെ പ്രധാന ഭാഗങ്ങളുമായി എഞ്ചിനെ വിജയകരമായി ബന്ധിപ്പിക്കുന്ന പ്രവർത്തനങ്ങൾക്ക് നേതൃത്വം നൽകും. കേന്ദ്ര സർക്കാരിന്റെ ആത്മനിർഭർ ഭാരത് നയത്തിന്റെ ഭാഗമായി തദ്ദേശീയ പ്രതിരോധ ഉൽപ്പാദനം ശക്തിപ്പെടുത്തുന്നതിൽ ഈ സംരംഭം വലിയ പങ്കുവഹിക്കുമെന്ന് ഭാരത് ഫോർജ് വൈസ് ചെയർമാൻ അമിത് കല്യാണി വ്യക്തമാക്കി.
നിരീക്ഷണ ദൗത്യങ്ങൾക്കും രഹസ്യാന്വേഷണ പ്രവർത്തനങ്ങൾക്കും അതിർത്തി സുരക്ഷയ്ക്കും എയർഫോഴ്സിനും നാവികസേനയ്ക്കും ഒരുപോലെ ഉപയോഗിക്കാൻ കഴിയുന്നതാണ് പുതിയ ഹെയ്ൽ ഡ്രോണുകൾ. ലോകോത്തര സാങ്കേതികവിദ്യയും ഇന്ത്യൻ നിർമ്മാണ മികവും ഒന്നിക്കുന്നതിലൂടെ ഇന്ത്യയുടെ പ്രതിരോധ മേഖലയിൽ വലിയൊരു സ്വയംപര്യാപ്തത കൈവരിക്കാൻ സാധിക്കും. പ്രതികൂല കാലാവസ്ഥയിലും പർവത മേഖലകളിലും മികച്ച പ്രവർത്തനം ഉറപ്പാക്കാൻ കഴിവുള്ള ഈ പുതിയ ഡ്രോൺ പദ്ധതി രാജ്യത്തിന്റെ തന്ത്രപ്രധാന സുരക്ഷയ്ക്ക് വലിയ കരുത്താകും.
