തിരുവനന്തപുരം : സ്‌കൂളുകളിൽ ഒരു പിരീഡ് അവധിയാണെന്ന് അറിഞ്ഞാൽ പുസ്തകവുമെടുത്ത് കയറിവരുന്ന് ചില അദ്ധ്യാപകരുണ്ട്. പി.ടി പിരീഡിന്റെ കാര്യം പിന്നെ പറയേണ്ട കാര്യമില്ല, രണ്ട് ദിവസം മുൻപേ അത് ബുക്ക് ചെയ്ത് കഴിഞ്ഞിട്ടുണ്ടാകും. അങ്ങനെ ഒരാളായിരിക്കും നമ്മുടെ കണക്ക് ടീച്ചർ. എന്നാൽ ഇനി സ്‌കൂളുകളിൽ ഇത് നടക്കില്ലെന്ന് അറിയിക്കുകയാണ് പൊതുവിദ്യാഭ്യാസ വകുപ്പ് ഡയറക്ടർ.
ഒന്ന് മുതൽ പന്ത്രണ്ട് വരെയുളള ക്ലാസുകളിൽ കലാ കായിക വിനോദങ്ങൾക്കായുള്ള പിരീഡുകളിൽ മറ്റ് വിഷയങ്ങൾ പഠിപ്പിക്കാൻ പാടില്ലെന്നാണ് നിർദ്ദേശം. ഇത്തരത്തിൽ മറ്റ് ടീച്ചർമാർ പഠിപ്പിക്കുന്നുവെന്ന് കുട്ടികളുടെ ഭാഗത്ത് നിന്ന് പരാതി ലഭിച്ചിട്ടുണ്ട്. ഇത് അവരുടെ അവകാശങ്ങൾ കവർന്നെടുക്കുന്നതിന് തുല്യമാണ്.
ഇത് സംബന്ധിച്ച് സംസ്ഥാന ബാലാവകാശ കമ്മീഷനാണ് പരാതി ലഭിച്ചിരിക്കുന്നത്. അതിനാൽ കലാ-കായിക വിനോദങ്ങൾക്കുള്ള പിരീഡുകളിൽ മറ്റ് വിഷയങ്ങൾ പഠിപ്പിക്കാൻ പാടില്ലെന്ന് സ്‌കൂളുകൾക്കും അദ്ധ്യാപകർക്കും വിദ്യാഭ്യാസ ഡയറക്ടർ നിർദ്ദേശം നൽകി. ഇത് സംബന്ധിച്ച് ഉത്തരവ് വിദ്യാഭ്യാസ വകുപ്പ് പുറത്തിറക്കി.
Discussion about this post