ഭുവനേശ്വർ: രാഷ്ട്രപതി ദ്രൗപതി മുർമു ഇന്ന് ഒഡീഷ സന്ദർശിക്കും. മൂന്ന് ദിവസത്തെ സന്ദർശനത്തിന്റെ ഭാഗമായാണ് രാഷ്ട്രപതി ഒഡീഷ സന്ദർശിക്കുന്നത്. സംസ്ഥാനത്ത് സംഘടിപ്പിക്കുന്ന വിവിധ പരിപാടികളിൽ പങ്കെടുക്കും.
ഒഡീഷയിലെ ഒരു വിഭാഗം മെഡിക്കൽ വിദ്യാർത്ഥികളുമായി മുർമു സംവദിക്കും. അതുത് ബന്ധൻ കുടുംബം സ്പോൺസർ ചെയ്യുന്ന മെഡിക്കൽ വിദ്യാർത്ഥികളുമായാണ് മുർമു കൂടിക്കാഴ്ച നടത്തുക. ഇതിന് ശേഷം വൈകുന്നേരം ഭുവനേശ്വറിലെ രാജ്ഭവന്റെ പുതിയ കെട്ടിടത്തിന്റെ തറക്കല്ലിടൽ കർമ്മവും നിർവഹിക്കും.
ബുധനാഴ്ച കട്ടക്കിൽ വച്ച് നടക്കുന്ന ഹൈക്കോടതിയുടെ 75 ാം വാർഷികാഘോഷത്തിന്റെ സമാപന ചടങ്ങിൽ പങ്കെടുക്കും. ഇതിന് ശേഷം കട്ടക്കിലെ എസ് സിബി മെഡിക്കൽ കോളേജ് ആന്റ് ഹോസ്പിറ്റലിന്റെ വാർഷികാഘോഷത്തിലും നാഷണൽ ലോ യൂണിവേഴ്സിറ്റിയുടെ ബിരുദദാന ചടങ്ങിലും മുർമു പങ്കെടുക്കും.
ഒഡീഷ സന്ദർശനത്തിന്റെ അവസാന ദിനമായ വ്യാഴാഴ്ച ഒഡീഷയിലെ രാജ്ഭവനിൽ വച്ച് വനവാസി സമൂഹവുമായി (പിവിടിജി)രാഷ്ട്രപതി സംസാരിക്കും. പ്രജാപിതാ ബ്രഹ്മ കുമാരീസ് ഐശ്വര്യ വിശ്വ വിദ്യാലയത്തിന്റെ ‘ദി ഇയർ ഓഫ് പോസിറ്റീവ് ചെയ്ഞ്ച’് എന്ന ഈ വർഷത്തെ പ്രമേയത്തിൽ രാജ്യമൊട്ടാകെയുള്ള സെമിനാറുകൾക്കും സമ്മേളനങ്ങൾക്കും രാഷ്ട്രപതി തുടക്കമിടും. ഭുവനേശ്വറിലെ ദസഭാട്ടയയിലെ ലയിറ്റ് ഹൗസ് കോംപ്ലക്സിന്റെ തറക്കല്ലിടൽ കർമ്മവും നിർവഹിക്കുമെന്ന് രാഷ്ട്രപതി ഭവൻ അറിയിച്ചു.
Discussion about this post