ഖാർതൂം: ആഭ്യന്തര കലാപവും കൊടിയ ദാരിദ്ര്യവും ഇസ്ലാമിക മൗലികവാദി ആക്രമണങ്ങളും രൂക്ഷമായ ആഫ്രിക്കൻ രാജ്യമായ സുഡാനിൽ ജനലക്ഷങ്ങൾ നരകയാതന അനുഭവിക്കുകയാണെന്ന് ലോകാരോഗ്യ സംഘടന. ഏപ്രിൽ മദ്ധ്യത്തോടെ രാജ്യത്ത് ആരംഭിച്ച ആഭ്യന്തര കലാപത്തിൽ മരണങ്ങൾ തുടരുകയാണ്. യുദ്ധം ചിന്നഭിന്നമാക്കിയ സുഡാനിൽ ആളുകൾ നാടും വീടും ഉപേക്ഷിച്ച് പലായനം ചെയ്യുകയാണ്. ഭക്ഷണവും പാർപ്പിടവും ആരോഗ്യ രക്ഷാ സംവിധാനങ്ങളും അന്യമായ ജനങ്ങൾ നെട്ടോട്ടമോടുകയാണ് എന്ന് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു.
ഏപ്രിൽ 15ന് രാജ്യതലസ്ഥാനമായ ഖാർതൂമിൽ ഉടലെടുക്കുകയും പിന്നീട് ദാർഫറിലേക്ക് വ്യാപിക്കുകയും ചെയ്ത ആഭ്യന്തര യുദ്ധത്തിൽ ഇതുവരെ മൂവായിരത്തോളം പേർ മരിച്ചതായാണ് കണക്ക്. കരസേന മേധാവി അബ്ദെൽ ഫത്താ അൽ ബുർഹാനെതിരെ മുൻ ഡെപ്യൂട്ടി മുഹമ്മദ് ഹംദാൻ ദാഗ്ലോയുടെ നേതൃത്വത്തിലുള്ള സമാന്തര സൈന്യം ആരംഭിച്ച ആക്രമണമാണ് ആഭ്യന്തര കലാപമായി വളർന്നിരിക്കുന്നത്.
48 ദശലക്ഷം ജനങ്ങൾ അധിവസിക്കുന്ന ദാർഫർ പട്ടണത്തിൽ ഒരു കെട്ടിടം പോലും അവശേഷിക്കാതെ എല്ലാം തകർക്കപ്പെട്ടു. കൂട്ടക്കൊലകളും വംശീയ കൊലപാതകങ്ങളും നിമിഷം തോറും നടക്കുകയാണെന്നാണ് പുറത്തുവരുന്ന വിവരം.
സുഡാനിൽ കഴിഞ്ഞ മൂന്ന് മാസത്തിനിടെ 26 ലക്ഷം പേർ കുടിയൊഴിപ്പിക്കപ്പെട്ടതായി ലോകാരോഗ്യ സംഘടന ചൂണ്ടിക്കാട്ടുന്നു. ആരോഗ്യ പ്രവർത്തകർക്കെതിരെ ഇസ്ലാമിക മൗലികവാദികൾ ആക്രമണങ്ങൾ അഴിച്ചു വിടുന്നതിനാൽ രാജ്യത്തെ 67 ശതമാനം ആശുപത്രികളും പ്രവർത്തന രഹിതമാണെന്ന് ഐക്യരാഷ്ട്ര സഭ റിപ്പോർട്ടിൽ പറയുന്നു. ആരോഗ്യ പ്രവർത്തകർക്കെതിരെ നടന്ന 51 ആക്രമണങ്ങളിൽ 10 മരണങ്ങൾ സംഭവിച്ചതായും 24 പേർക്ക് പരിക്കേറ്റതായുമാണ് റിപ്പോർട്ട് വ്യക്തമാക്കുന്നത്.
രാജ്യത്തെ 4 ദശലക്ഷം സ്ത്രീകളും പെൺകുട്ടികളും കൂട്ടബലാത്സംഗങ്ങൾക്ക് ഇരകളായതായി പ്രാദേശിക മാദ്ധ്യമങ്ങൾ റിപ്പോർട്ട് ചെയ്യുന്നു. മഴക്കാലം ആരംഭിച്ചതോടെ പകർച്ചവ്യാധി ഭീഷണിയും രൂക്ഷമാണ്. സെൻട്രൽ ആഫ്രിക്കൻ റിപ്പബ്ലിക്ക്, ചാഡ്, എത്യോപ്യ, സൗത്ത് സുഡാൻ തുടങ്ങിയ രാജ്യങ്ങളിലേക്ക് വലിയ അഭയാർത്ഥി പ്രവാഹമാണ് സുഡാനിൽ നിന്നും ഉണ്ടായിക്കൊണ്ടിരിക്കുന്നത്. സ്വതവേ ദരിദ്രമായ ഈ രാജ്യങ്ങളുടെ അവസ്ഥയും ഇതോടെ കൂടുതൽ ദയനീയമാകുകയാണെന്നാണ് വിവരം.
