ന്യൂഡൽഹി : ഇന്ത്യയുടെ മൂന്നാമത്തെ ചാന്ദ്ര ദൗത്യമായ ചാന്ദ്രയാൻ -3 പേടകം ചന്ദ്രനിലേക്ക് കൂടുതൽ അടുത്തുകൊണ്ടിരിക്കുകയാണ്. ഈ യാത്രയിൽ ചന്ദ്രന്റെയും ഭൂമിയുടെയും അവിശ്വസനീയമായ ചില ചിത്രങ്ങളും ചാന്ദ്രയാൻ-3 പകർത്തിയിട്ടുണ്ട്. 2023 ജൂലൈ 14 ന് ഭൂമിയുടെ ചില അവിശ്വസനീയ ചിത്രങ്ങൾ ചാന്ദ്രയാൻ-3 പകർത്തിയിരുന്നു. ചന്ദ്രന്റെ ആകർഷണവലയത്തിൽ പ്രവേശിച്ചതിനുശേഷമാണ് ചന്ദ്രനിലെ ഗർത്തങ്ങളുടെ വിശദമായ കാഴ്ച നൽകുന്ന ചിത്രം ചാന്ദ്രയാൻ -3 പകർത്തിയത്.
ചാന്ദ്രയാൻ -3 പേടകത്തിലെ ലാൻഡർ ഹൊറിസോണ്ടൽ വെലോസിറ്റി ക്യാമറ (LHVC) ആണ് ചിത്രം പകർത്തിയിരിക്കുന്നത് . അഹമ്മദാബാദിലെ സ്‌പേസ് ആപ്ലിക്കേഷൻസ് സെന്ററും ബെംഗളൂരുവിലെ ഇലക്‌ട്രോ ഒപ്‌റ്റിക്‌സ് സിസ്റ്റംസ് ലബോറട്ടറിയും ചേർന്നാണ് ഈ ക്യാമറ വികസിപ്പിച്ചിട്ടുള്ളത്. ചാന്ദ്രയാൻ -3 അയയ്ക്കുന്ന ഓരോ ചിത്രങ്ങളും ഐഎസ്ആർഒയുടെ ചാന്ദ്രദൗത്യത്തിലെ നാഴികക്കല്ലുകളാണ്.
നിലവിൽ ചന്ദ്രനിൽ നിന്നും 1400 കിലോമീറ്ററുകളോളം അകലെയാണ് ചാന്ദ്രയാൻ-3 ഉള്ളത്. ഓഗസ്റ്റ് 23-ന് പേടകം ചന്ദ്രോപരിതലത്തിൽ സോഫ്റ്റ് ലാൻഡിംഗ് നടത്തുമെന്നാണ് പ്രതീക്ഷിക്കുന്നത്. ഭാവിയിൽ വിവിധ ഗ്രഹങ്ങളിലേക്കുള്ള ബഹിരാകാശ ദൗത്യങ്ങൾക്ക് വഴിയൊരുക്കുന്നതിന് ചാന്ദ്രയാൻ-3യ്ക്ക് കഴിയുമെന്നാണ് കരുതപ്പെടുന്നത്.
